Биз биргебиз! Биз – Россейбиз!

Орта кюн Нальчикде Музыка театрда «Донбасс» атлы сыйлы къырал академия тепсеу эм жыр ансамбльни, «Кабардинка» академия тепсеу эм «Балкария» фольклор-этнография тепсеу ансамбльлени жандауурлукъ концертлери болгъанды. Ол Россейни эмда Къабарты-Малкъарны Культура министерстволарыны башламчылыкълары бла «Биз – Россейбиз» федерал программаны чеклеринде къуралгъанды.

Аны ачылыуунда КъМР-ни Правительствону Председатели Мусукланы Алий жазгъан адресни аны орунбасары Марат Хубиев окъугъанды, Къырал Думаны республикадан депутаты Геккиланы Заур эмда Къабарты-Малкъарны Парламентини спикери Татьяна Егорова сёлешгендиле. Мусукланы Алий къонакълагъа айтхан сёзюнде: «Бу къыйын кезиуде бизни республиканы адамлары Донецк Халкъ Республикагъа бла Луганск Халкъ Республикагъа къарындашлыкъ сезимин билдирип, кёл этдиредиле. Россейни маданияты халкъланы маданиятларындан къуралады. «Биз – Россейбиз» федерал программа бизге бир бирге билеклик этерге чакъырады», – деп айтылгъанды. Дагъыда ол санат ишчилеге илхам, саулукъ да тилегенди.

Татьяна Егорова Донбасс бизге не жаны бла да жууукъ болгъанын, арада байламлыкъ кёп сынамлада кючленнгенин белгилегенди. «Бусагъатда Донбассха къарындаш билеклик этиу  борчубузду. Бу концерт бизни бир бирге татлылыгъыбызны шагъатыды», – дегенди ол.

Геккиланы Заур а Россей ючюн, бизни республикабыз ючюн, Донбасс ючюн да тилек бла башлагъанды сёзюн. Ол, аны иги адамларына ыразылыгъын айтып, ала бизге бюгюн кеслерини бир кесекчиклерин – сейирлик ансамбльлерин ийгенлерин белгилегенди эм ол шарт ючюн алагъа ыспас этгенди.   
Юч ансамбль да кеслерини усталыкъларын кёргюзтгендиле.

«Донбасс» академия тепсеу эм жыр къырал ансамбльни директору Ольга Горячева ансамбль 1937 жылда къуралгъанын, андан бери да ишин тохтатмагъанын айтханды. «Бу гастрольла Дондагъы Ростовда башланнгандыла. Биз бу кюнледе Краснодар эм Ставрополь крайлада, Адыгеяда бла Шимал Осетияда болгъанбыз. Мындан Махачкъалагъа, Астраханьнга, Элистагъа, Волгоградха атланырыкъбыз Узакъ Востокгъа дериди жолубуз. Программагъа кёре, эллиден артыкъ шахарда боллукъбуз. Бизге Нальчикде ариу тюбегендиле. Бизни таныгъан, билген адамлагъа – Энейланы Магометге, Игорь Атабиевге къонакъ болгъаныбыз а бютюнда къууанчлыды», – дегенди. Ол бу къыйын кезиуде аланы быллай концертлери Донбасс таукеллигин тас этмегенини белгиси болгъанын чертгенди.

«Донбасс» къараучулагъа, «Донбасские парни» деген тепсеу бла башлап, «Калинка», гопак, «Моряки Азовской флотилии», «Русский танец», «Казачий пляс», «Русская зима», «Барыня», «Пряники» деген эм башха тепсеулени кёргюзтгендиле. Аланы сахнада от бла, кюнча жарыкълыкъларын, аязча теркликлерин, иги ишленнген тепсеулерин республиканы жамауаты бек жаратханды.  

Андан сора да, донбассчыла жырла бла къууандыргъандыла. Концерт «Не возвращайте на Донбасс войну!» деген жыр бла башланнганды. Аны Украинаны сыйлы артисткасы Виктория Струкова жырлагъанды. Жыр айтылгъанда, ары келген адамла ёрге къобуп, алай билдиргендиле Донбасс бла бу кюрешде бирликлерин. Дагъыда жыр айтханланы араларында Евгений Васькин бла Анатолий Миняло да болгъандыла.

«Балкария» фольклор-этнография къырал тепсеу ансамбль тюз тепсеу, абезех, «Къамала бла тепсеу», «Асланбий», «Хардар» эм башха номерле бла къууандыргъанды. «Кабардинка» къырал академиялы тепсеу ансамбль а къафа, «Танец причерноморских адыгов», «Черкесское игрище», удж, исламей деген эм башха тепсеуле кёргюзтгенди.