Казбек Коков регион правительствону къаууму бла кенгеш бардыргъанды

КъМР-ни Башчысы Казбек Коков регион правительствону къаууму бла бардыргъан кезиулю кенгешде  РФ-ни Президентини «Россей Федерацяда социал-экономика тутхучлулукъну жалчытыу эмда аны халкъын къоруулау жаны бла мадарланы юсюнден» Указы къалай толтурулгъанына къаралгъанды.

«Владимир Путин регионлагъа социал-экономика жаны бла себеплик этиуню мадарларына атап, кенгеш бардыргъанды, анда санкцияланы кезиуюнде бек алгъа тамамланыллыкъ ишле белгиленнгендиле. Ол а къыйын жашау болумгъа тюшгенлеге, бек алгъа сабийли юйюрлеге, тутхучлулукъ этиудю, социал тёлеулени барысын да, ол санда пенсияланы, бюджет сферада иш хакъны, жашау этерге жетерик ахчаны бек аз ёлчемин кётюрюудю.

Санкцияла къысыулукъ этип тургъан болумлада Россейни экономикасын айнытыуну баш магъаналы ишлерини планы да къабыл кёрюлгенди. Президентни оноуу бла регионлагъа берилген полномочияланы магъаналары да бек уллуду. Башхача айтханда, жер-жерледе башламчылыкъла, белгиленнген борчланы терк толтуруу, жууаплылыкъ изленедиле», - дегенди Казбек Коков, кенгешни башлай.

Ызы бла КъМР-ни урунуу эмда социал къоруулау министри Асанланы Алим сёлешгенди. Ол билдиргенича, жылны башындан бери тюрлю-тюрлю тёлеуле бла 246 938 инсан жалчытылыннганды, битеу да 3,8 миллиард сом юлешиннгенди. 8-16-жыллыкъ сабийлери болгъан эмда къолайлары артыкъ уллу болмагъан юйюрлеге ай сайын ахча болушлукъ бериуню амаллары да сюзюле турадыла.

КъМР-ни къурулуш эмда ЖКХ министри Алим Бербеков а  ишни чырмарыкъ, тохтатырыкъ сылтаула болмагъанларына,  авариялы запас къуралгъанына ышандыргъанды. Жол къурулуш жаны бла да тыйгъычла сакъланмайла, дегенди КъМР-ни транспорт эмда жол мюлк министри Аслан Дышеков. «Транспорт бла жалчытыу толу ёлчемде бардырылады, адамланы ташыу бла кюрешгенле бла ыйыкъгъа эки кере тюбешебиз, шёндюгю болумну ангыламагъан жокъду», — деп къошханды министр.
КъМР-ни жарыкъландырыу, илму эмда жаш тёлюню ишлери жаны бла министри Анзор Езаов билдиргеннге кёре, исси аш-азыкъ бла 1-4 классланы окъуучуларыны 52 мингдлен асламы жалчытылыннганды. Казбек Коков сабийлени ашларыны качествосун энчи контрольгъа алыргъа буюргъанды.

Кенгешде дагъыда республиканы рынокларында болумгъа къаралгъанды. КъМР-ни промышленность, энергетика бла сатыу-алыу министри Шамиль Ахубеков  аш-азыкъ эм башха товарланы багъалары дайым тинтилгенлей тургъанларын билдиргенди. Багъалагъа кёз-къулакъ болуу жаны бла штаб, ары уа Монополиялагъа къажау службаны бла МВД-ны келечилери да киредиле,  багъаланы сылтаусуз кётюргенлени кеслерини полномочияларына кёре жууапха тартадыла.

Министр дагъыда республиканы промышленность предприятиялары ишлерин алгъыннгы низамгъа кёрен бардыргъанларын билдиргенди.

КъМР-ни саулукъ сакълау министри Рустам Калибатов а республиканы саулукъ сакълау учреждениялары чырмаусуз ишлер ючюн къаллай мадарла этилгенлерини юсюнден айтханды. Ол айтханнга кёре, дарманла сатыу бла хал да тутхучлуду, барысы да россейли рынокда ишлейдиле. «Льготалы дарманланы юслеринден айтханда, ала да жетиширча бардыла, нек дегенде ала жылны башында окъуна алыннган эдиле. Аптекалада тинтиуле бардлырылгъанлай, къаллай дарманла жетишмегенлери билиннгенлей турлукъду. Бир-бир дарманланы жетишмегенлерини баш сылтауу а халкъны гузаба этгени бла байламлыды. Жууукъ заманда ол кемчилик да кетерилликди.

 Бизнес бла байламлы этилген мадарланы юслеринден да КъМР-ни экономиканы айнытыу миинистри Рахайланы Борис хапарлагъанды. Ол айтханнга кёре, Россейни Банкыны бла Россейни Правительствосуну кредит каникулла бла байламлы программалары толтурулгъанды. Россейни Банкы банклагъа Правительство белгилеген бёлюмледе ишлерин бардыргъан гитче эм орта бизнесге кредитлерини тёлеу жорукъларын тюрлендирирге онг бергенди. Ол амал промышленностьда, сатыу-алыуда бла эл мюлкде хайырланылады.  

КъМР-ни эл мюлк министри Хасан Сижажев Россейни Эл мюлк министерствосуну бла КъМР-ни Правительствосуну араларында 2,3 миллиард сомгъа 9 келишим къабыл этилгенин билдиргенди. Ол ахча битимчиликде, малчылыкъда эл мюлк производствону айнытыугъа, дагъыда фермерлеге болушлукъгъа, эл кооперацияны аякъландырыугъа, инвестиция кредитлени процент ставкаларыны бир кесеклерин тёлеуге эмда «Эллени комплекс халда айнытыуну» къырал программада белгиленнген ишлеге бёлюнюрюкдю.

 Кенгешни ахъырында Казбек Коков программалада белгиленнген ахчаны ёлчемлери сакъланырыкъларына, алагъа къошула барлыгъына ышандыргъанды. «Россейни Президенти Владимир Путин хар жаны бла да ёсюм болсун деп, аллай борч салгъанды. Бизни кесибизни бирикдирилген бюджетибизде 60 миллиард сомубуз барды. Къыралыбызны экономикасыны тутхучлулугъу, терк оноу эте билиу, федерал правительствону себеплиги регионлагъа экономика къысыулукъну жумушатыргъа, шёндюгю тюрлениулеге терк юйренирге, айныугъа жангы онгла табаргъа  болушадыла», - дегенди Коков.