Бизни Ахузат

Газетде ишлерге келгенледен кёпле, хо, кёрейим, жаратмасам, болалмасам, кетерме деп, арсарлы болсала да, анда кёп жыллагъа къаладыла. Бир  ауукъ замандан а газетни шуёх коллективи аны ёз адамларыча боладыла. Редакцияда сау элли жыл ишлесенг а, ол сезим бютюн уллугъа айланады. Кёпле: «Редакция экинчи юйюм кибикди», – деп, таукел айтыргъа боллукъдула. Созайланы Акону къызы Ахузат да ма аллайланы арасындады.

Ол редакциягъа элли жыл мындан алгъа келгенди. Бюгюн да аны бет сыфаты тюрленмегенча кёрюнеди манга. Узун къара чачына уа  биз, газетде ишлеген тиширыула, барыбыз да сукълана эдик. Ол аны эки айырып, сыйдам жыйып, энишге жибериучюсю эсимдеди.

Ахузат корректорну болушлукъчусу болуп башлагъан эди урунуу жолун. Къолуна алгъан хар ишине уллу жууаплылыкъ бла къарагъан, аны тынгылы тамамлагъан адам болгъаны себепли, тамата коллегаларындан сурап, соруп, ишини жашырынлыкъларына терк тюшюннгенди. Аны алайлыгъын кёрген таматала кёп да бармай, корректоргъа саладыла.

Газетни бетлеринде халатла болмазына къайгъыра, хар бетни эки, бирде уа юч кере да къайтарып окъуучу эди. Редактор, аны орунбасарлары, башха журналистле да: «Ахузат окъугъан эсе, халатланы не хазна тапхын», – деучю эдиле.

Андан сора уа Ахуну (биз, аны къубултуп, атына алай айтыучубуз) письмола бёлюмню таматасыны болушлукъчусуна кёчюредиле. Анда да адепли, адетли къызыбыз буюрулгъан борчну  тынгылы, адам чурум тапмазча тамамлайды. Бюгюнлюкде да ма ол халда бардырады ишин. Энди редакцияда ишлегенли элли жыл болады. Ол кёпмюдю, азмыды? Жашаугъа ол бек аз заманды. Ишге уа кёп сунама. Аны ишчи китапчыгъында жаланда эки жазыу барды: ишге алыннганыны бла бир бёлюмден башхасына кёчюрюлгенини юсюнден.

Ахузат редакциягъа Къабарты-Малкъар къырал университетни жетишимли бошагъандан сора келгенди. Бюгюнлюкде ол республикада атлары айтылгъан адамларыбыз: телерадиокомпанияны диктору, барыбыз да сюйген, ауазына тынгыларгъа кюсеген Отарланы Мажит, жырчыла Тетууланы Шарафутдин, Алтууланы Зоя бла бир курсда окъугъанына ёхтемленеди. «Билемисе, Мажит, Ёлмезланы Борис, Шарафутдин, Ёзденланы Хызыр, Ксаналаны Нажмудин да мени тюз ёз эгечлерича кёргендиле. Курсубузда къызла, жашла да сегизишер эдик, анга да къарамай, жашла манга бла Зоягъа энчирек болгъандыла. Мен аланы барысын да уллу сюймеклик бла эсгереме», – дейди  Ахузат.

Корректорну болушлукъчусу болгъанда, ол Алийланы Кулина бла бирге ишлегенди, письмола бёлюмге уа Этезланы Дауут пенсиягъа кетгенден сора кёчгенди. Анда ол Уллу Ата журт урушну ветераны, огъурлу адам Кючюкланы Магометни башчылыгъында ишлеп башлагъанды. Ариу тилли, ышармай сёлешмеген Магомет жаш къызны кёп затха юйретгенди. Ол ишден кетгенден сора уа, Ахузат Жаникаланы Мажит, Юсюпланы Омар, Османланы Хыйса бла ишлегенди. Аланы адамлыкъларыны, огъурлулукъларыны юсюнден да сагъатла бла айтып турургъа боллукъду. «Къаллай ахшы, тынгылы адамла ишлеучю эдиле ол заманда! Ала, къалай эсе да, башха тюрлю эдиле: чынтты эр кишиле, халкъгъа жараргъа итиннгенле», – деп эсгереди Ахузат.

Аху гюллени бек сюеди. Кабинетинде ала кёпдюле. «Аны гюллери бир иги ёседиле», – деп, аз тилемегенбиз аланы. Бир жол журналда окъугъанма: «Гюлле огъурлу адамны къатында бютюн бек чагъадыла, айныйдыла», – деп. Бизни Аху аллай болгъанына  Хасанияда Токълуланы къоншулары бары да шагъатдыла. Ары къызыбыз Токълуланы Магометни жашы Борисге эрге баргъанды. Бир арбазда туугъан эгечлеча юч келин, юч апсын жашагъандыла. Ким биледи, къайын ананы бла атаны игилиги, ауур акъыллылыкълары, ала уа керти да элде огъурлу, юлгюге айтырча адамла эдиле, ючюнмю, огъесе келинлени да басымлылыкълары бламы, оналты адам бир юйюрча жашагъандыла.

Сабийле туугъандыла. Ала да абаданладан юлгю ала, бир-бирлерине туз-гыржындан юлюш этгендиле. Араларында сеники, меники деген болмагъанды. Ахузат а Токълуланы тамата келинлери эди. Ол арбазда отуз эки жылны жашагъанды. Аланы бирини да бир терс хапарлары чыкъмагъанды. 2015 жылда къайын аналары ауушханда уа, Ахузат ол бушууну иги кесекге дери да унуталмай, къарасын тешмей тургъанды…

Бюгюнлюкде баш иеси Борис бла юй ишлеп, энчи жашайдыла. Къыз, эки жаш да ёсдюргендиле. Алты туудукълары уа кёз гинжилеридиле.  

Быйылгъы жыл Токълуланы юйюрге дагъыда бир ненча къууанч бла айырмалыды. Бир кесекден аланы юйюрлерине дагъыда эки бала къошуллукъду, андан сора уа, кёп бармай, Ахузат туугъанлы 70-жыллыкъ юбилейин къууанч бла белгилерикди. Анга кёп алгъышла айтыллыкъ болурла, биз да, редакцияны коллективи, алагъа къошулабыз.