Туризмни айнытыуну баш амалы - биригиу

 «СКФО-да 2035 жылгъа дери туризмни айнытыуну стратегиясын» эм «Кавказские Минеральные Водыны курорт шахарларын 2030 жылгъа дери битеулю халда айнытыу» программаланы толтуруу бла байламлы Пятигорскну къырал университетинде «тёгерек стол» болгъанды. Анга Къабарты-Малкъарны курортла эм туризм министрини орунбасары Шауаланы Ислам да къатышханды.

 Жыйылыуда  туризмни эсепде тутхан власть органланы, коммерциялы бёлюмлени эм округну профильли билим бериу учрежденияларыны рекреация хазнаны игилендириуде кючлерин бирикдириуню амалларын излеуге, кадрланы усталыкъларын ёсдюрюуге, бир бирлери бла файдалы байламлыкъланы тохташдырыугъа баш магъана  берилгенди.

 Стратегияда айтылгъанына кёре, округну экономика-география, транзит жаны бла онглары ахшыдыла, алай ала алыкъа тийишлисича  айнытылмагъандыла. Университетни ректору Александр Горбунов белгилегенича,  Шимал Кавказ Россейни, тыш къыралланы гражданларына да сейирди, ала мында кёп жангы зат кёрюрге боллукъдула. «Биз тыш къыралладан эм башха федерал округладан келген студентлерибизге тёрели халда экскурсияла, ол санда къоншу республикалагъа да жолоучулукъла къурайбыз, алагъа табийгъатыбызны айтхылыкъ жерлерин кёргюзтебиз», - дегенди ол.

Кадрланы юсюнден айтханда, жыйылгъанла регионда халкъла аралы излемлеге келишген билимлери, сынамлары  болгъан ишчилени жетишмегенлерин чертгендиле. Ректор аны бла байламлы округну кёп вузларында бу жаны бла тынгылы билим бергенлерин чертгенди. Ол бу сорууну «Кавказ.РФ» акционер обществону генеральный директору Хасан Тимижев бла  сюзгенди эм Пятигорскну университети бу проблеманы тамамлаугъа уллу къошумчулукъ этеригинде тохташхандыла. Белгиленнгенича, университетде аны ючюн кючлю мурдор, энчи специальностьлагъа окъутурча факультетле бардыла.

Кенгешде  быллай жыйылыуланы бардыра турургъа кереклиси айтылгъанды, сейирлери болгъан министерстволаны, предприятияланы эм билим бериу учрежденияланы кючлерин бирикдирирге оноу этилгенди. Андан тышында, бюгюнлюкде рекреация  предприятияланы специалистлери усталыкъларын ёсдюрюрча курсла къураргъа, ол санда аланы тыш къыраллы тиллеге юйретирге да  тийишлиди деп, аллай эсгертиуле этилгендиле, деп билдиредиле республиканы Курортла эм туризм министерствосуну пресс-службасындан.