Банкда тутхан ахчаны артха алыргъа сюйгенлеге тыйгъыч боллукъмуду?

Соруу-жууап

Ара Банкда айтханларына кёре - угъай, боллукъ тюйюлдю. Тыш къыралла салгъан чеклениулени хатасындан Россейге АБШ-ны долларлары хазна келмейдиле. Ма аны ючюн бизде банкла адамлагъа аланы сатмай тохтагъандыла. Ара Банк алгъаракъда этгенди ол оноуну. Иш алай быйыл 9-чу сентябрьге дери боллукъду. Сомлу счётлагъа эмда вкладлагъа уа бир тюрлю чек салынмагъанды. Ала толусунлай сакъланадыла. Ахчаларын тешерге неда ары къошаргъа сюйгенлеге жол ачыкъды.

Газ быргъыны хакъсыз тартыу программа энди ишлерикмиди?

РФ-ни Промышленность министерствосундан билдиргенлерича, бу программа планына кёре барады, аны болжалы тюрленмегенди. Бизни къыралда бу ишни эбине жетдирирча бар онгла бардыла, дегендиле анда.

Саулай айтханда, бюгюнлюкге 517 минг заявка берилгенди. Тергеулеге кёре, газ быргъыла эки миллиондан артыкъ юйню аллына келликдиле.

Бу ишни «Газпром» бардырады. Анга регионла да къошуладыла. Компания быргъыны эллеге дери созады, аланы ичинде ишлени уа регионла тындырадыла.

Заявка берирге сюйгенле https://connectgas.ru/, http://www.gazprommap.ru/ сайтлагъа, «Госуслуги» къырал порталгъа кирип жазаргъа неда 8-800-101-00-04 номерге сёлеширге боллукъдула.

 Вклад келтирген файда ючюн налог тыйыллыкъ тюйюлдю

Озгъан жылдан башлап бизни къыралда банклада бир миллиондан артыкъ сом тургъан вкладла келтирген файда ючюн налог тёлерге керек эди. Аны ёлчеми 13 процентди. Бюгюнлюкде уа Правительство гражданлагъа себеплик этер хыйсап бла аны кетерирге оноу этгенди. Алай бла быйылгъы угъай, былтыргъы налогну да тёлерге керек тюйюлдю.

«Ключевой ставка кётюрюлгенлей кредит организацияла вкладланы юсю бла тёлеген процентлени кёбейтгендиле. Анга кёре ахчаларын банклада тутханла кёбюрек хайыр аллыкъдыла. Алай налогдан да асламыракъ тёлерге тюшерик эди. Этилген оноу адамлагъа шёндюгю болумда эс тапдырлыкъды», - дегенди премьер-министр Михаил Мишустин.

Бал туздан къыстырыкъ этерге керекмиди?

РФ-ни Эл мюлк министерствосунда бу соруугъа угъай дейдиле. Нек дегенде, бал туз артыкъ кёп заманны сакъланмайды. Ол биринчиси. Экинчиси уа Россей кесин аны бла эмда эм биринчи изленнген ашла бла толусунлай жалчытады. Аладан этилген къыстырыкъ битеу къыралгъа жетерикди. Сурам ёсгени ючюн а бал туз чыгъарыучу заводла шёндю кече, кюн демей бютюнда тири ишлеп башлагъандыла.

Алай эсе, тюкенледе уа ол нек азайгъанды? Аны биринчи сылтауу – гузабалыкъ. Эсигизде эсе, коронавирус ауруу жайылып башлагъанда да алай болгъан эди.

Быллай тынгысыз кезиуледе саудюгерчиле да тириледиле. Алагъа чек салыр ючюн федерал сатыу-алыу сетьледе быллай продуктланы бир адамгъа мардасы бла сатаргъа оноу этгендиле.

Эсге сала айтсакъ, бал туз социал жаны бла магъаналы продуктха саналады. Аны эмда ол категориягъа кирген ашарыкъланы багъаларына тюкенле беш процентден артыкъ къошаргъа эркин тюйюлдюле. Бу излем толтурулмагъанын эслесегиз а, ФАС-ха тарыгъыгъыз. Тюкенледе товар жетмегинин кёрсегиз, аны юсюнден жер-жерли власть органлагъа билдиригиз.

Тюкенледе багъала жик-жиги бла жазылыргъа керекдиле

Роспотребнадзорда ангылатханларыча, законнга тийишлиликде сатыучула битеу товарларыны багъаларын шарт жазаргъа борчлудула. Алыучу да излеген затын анга кёре сайлайды.

Товарны юсюнде ол не зат болгъаны эмда багъасы кёргюзтюлюрге керекди. Экинчиси – сомла бла. Тыш къыралланы ахчаларын жазаргъа эркинлик берилмейди.

Багъасында жазылгъандан кёп излей эселе сизден, тюкенни администрациясына сёлешигиз. Алай ахчасын тёлегенден сора эслеген эсегиз аны, тюкен ол башхалыкъны сизге къайтарыргъа борчлуду.

Тарыгъыуугъуз бар эсе, Роспотребнадзоргъа барыгъыз неда аны консультацияла берген арасына 8-800-555-49-43 номер бла сёлешигиз.