Кеслери алларына мюлк къурагъанла субсидияла алыргъа боллукъдула

Быйылгъы жылдан тебиреп РФ-ни Правительствосуну бегимине тийишлиликде, кеслери алларына иш къуранла эсепде болгъан энчи иеликде жюрюген мюлкле, къыралны жанындан болушлукъ аллыкъдыла. 

 Россельхозбанкны Къабарты-Малкъар бёлюмюню таматасы Алим Сокуров    законда болгъан тюрлениулени   эм ол болушлукъну кимле алыргъа боллукъларыны  юсюнден, биз берген соруулагъа жууапла бергенди.   

- Алим Олегович, жангыдан чыкъгъан законну магъанасы неди, къыралны не мураты барды ол жаны бла? 

- Къабыл этилген бегим кеси алларына иш къурап эсепде тургъанлагъа   къыралдан  болушлукъ алыргъа онг береди. Саулай къыралны юсюнден айтханда уа, эл мюлк продукцияны аслам чыгъарыргъа, сатыу-алыу этген жерлерибизни ата журтлу товарла бла толтурургъа, тыш къыралладан келтирилген аш азыкъны алышындырыргъа эм элледе жашагъанланы къолайларын игилендирирге онг береди.

-Сёз ючюн, мени энчи иели мюлкюм барды. Субсидияны алыргъа не этерге керекме?

 -Бек алагъа сиз энчи иели мюлкюгюз болгъанына эсепде турургъа керексиз, ол бек баш излемледен бириди.

 -Субсидия не зат ючюн бериледи, аны ёлчеми къаллай бирди?

 -Болушлукъ сиз мюлкюгюзню жюрютюрге этген къоранчланы бир кесегин къайытарыргъа, ол санда ачыкъ бахчалада тахта кёгетлени ёсдюрюрге, картофну, сютню, эт эм андан этилген азыкъланы чыгъарыргъа, эт берген малланы, къойланы эм эчкилени  санларын кёбейтирге бериледи.

Субсидия энчи иели мюлклери болгъанланы хар бирине да берилмейди. Сёз ючюн, чибинле тутуп бал сата эсегиз, бегимни шёндюгю редакциясына кёре сиз къыралдан болушлукъ алаллыкъ тюйюлсюз.

Хар регион субсидияны ёлчемин кеси тохташдырады.

 -Къагъытланы жарашдырыргъа къайры барыргъа керекди?

- Субсидияны алыргъа жер-жерли муниципал власт органлагъа, ол жерли департаментлеге не да эл мюлк министерствогъа.  Бирилген заявкалагъа кёре, энчи иели мюлклери болгъанла ахча берилирге керекли реестрге тюшедиле. Субсидияла тохташдырылгъан тизмеге кёре бериледиле.

-Къаллай къагъытланы жыйяргъа керекди къыралдан болушлукъ алыр ючюн?

 -Субсидия- ол къырал ахча болгъаны себепли, къагъытларыгъызда энчи иели мюлкню жюрютгенигизге ачыкъ шартла, тюрлю-тюрлю жумушлагъа этилген къоранчланы юсюнден да айтылыргъа тийишлиди.    

 Андан сора субсидия алыргъа заявление жазаргъа керекди, энчи иели мюлкюгюзню паспорту,  иш къурап хайырыгъыздан налог тёлерге эсепге тюшген справка, мюлк жюрютген китапыгъыздан билдириуле, анда 12 айны ичинде къаллай бир продукция чыгъаргъаныгъызны юсюнден хапар да болургъа керекди.

Дагъыда эл мюлк продукцияны чыгъарыу да, производствону кенгертирге  этилген къоранчланы юсюнден, ол санда сатыу -алыу келишимле, товар алгъан чекле, аслам ырысхыны жюрютгеннге шагъатлыкъгъа финанс биригиуден эм субсидия алыуда суралгъан башха къагъытла изленедиле.

- Алим Олегович, субсидия бир кереми, огъэсе аны дагъыда алыргъа боллукъмуду? 

- Ахча тёленнген бир кере этиледи. Аны дагъыда алыргъа боллукъду, субсидияны къыйматлы хайырланнганыгъызгъа, анга шагъатлыкъгъа  субсидияла берген регион органда къабыл этилген къагъытлагъа тийишлиликде бардыра эсегиз ишигизни.

Бизни корр.