Ашхы урлукъ чыгъарыргъа алланып

Кёп болмай КъМР-ни Эл мюлк министерствосу къурап Сабанлыкъны кюню ётгенди. Ол нартюхню бла чеплеуню ёсдюрюуге жораланнганды. Программагъа кёре, семинар бардырылгъанды, жангы сортланы, гибридлени да кёрмючлери къуралгъандыла. Анга алимле, эл мюлкде ишлегенле, предпринимательле эм башхала да къатышхандыла.  

КъМР-ни эл мюлк министри Хасан Сижажев, жыйылыуну ача, алгъаракълада быллай тюбешиу къылкъылылагъа бла картофха аталгъанын, бюгюн а республикагъа тёрели битимле - нартюхню бла чеплеуню ёсдюрюу бла байламлы соруула сюзюллюклерин эсгертгенди. Ол санда аланы салгъан мюлклеге да къошула баргъанын чертгенди.  

Сёз ючюн, 2010 жылда республикада нартюх ёсдюрюлген жерлени уллулугъу 67,5 минг квадрат метр болгъан эсе, бюгюнлюкде ол, 138,1 минг квадрат метрге жетдирилип, эки кереге кёбейгенди. Саулай алып айтханда, мирзеулюк эм къудору битимледен 62 проценти анга жетеди.

Мюлкледе нартюхден бай тирлик алырча мадарла бардырадыла, ол санда  сугъарыугъа аслам эс бёлюнеди. Аны хайыры бла арт жыллада бир гектардан 70 центнер алырча мадар этилгенди. Ол а бирси заманладан 48 процентге кёпдю.

Республиканы сабанлыкъларыны 20 минг гектар чакълы биринде жауун халда сугъаргъан 212 машина ишлейдиле. Ол санда быйыл жылны аллында дагъыда 38 машина алынып, аллай жерлени 3, 1130 гектаргъа кёбейтирча мадар этилгенди. Аны бла къалмай, жылны ахырына энтта да 5409 гектарда мелиорация жумушла тамамланыллыкъдыла.

Министр айтханнга кёре, республикада чыгъарылгъан нартюхню гибрид тюрлюлери кенг белгилидиле. Болсада мындан арысында бёлюм рынокда кесини жерин табарча этерге, селекцияны тири бардырып, сурам болурча сортла хазырларгъа тийишлиди.  

Семинардан сора жыйылгъанла кёрмючде нартюхню бла чеплеуню жангы сортлары бла шагъырейленнгендиле.