Шыкъыда унутулмазлыкъ тюбешиу

Газетибиз бла кёп жылланы байламлыкъ жюрютюп тургъанладан бири – булунгучу Аппайланы Магомет – ауушханлы жарым жыл чакълы болады, Аллах жаннетли этсин. Не заманда да бизни, окъуучуланы да сейир материаллары бла къууандырып туруучу акъсакъал эллилерини эслеринде огъурлу халли, чамгъа уста адамча къалгъанды. Юйдегиси Маригъат бла уллу юйюр ёсдюрюп, сабийлерини хар бири да энчи жашауларын къурарча этип, аталыкъ борчун толтуруп дейик, алай алышханды дуниясын Аппай улу.

Жаш заманындан да билимге, окъуугъа итиннген Магомет бизге кёп сейир хапарла жиберип тургъанды. Бюгюн сизни аны закий Кязим бла биринчи тюбешиуюню юсюнден эсгериулери бла шагъырей этерге сюеме.

«Кязим бла биринчи кере къалай шагъырей болгъанымы айтайым. 1939 жылда, къыш школ каникулланы кезиуюнде, 14-жыллыкъладан онтёрт комсомолчу жаш Булунгудан Шыкъыгъа барабыз. Ол заманда районну буйругъу бла эки элни да школлары шуёхлукъ жюрюте эдиле. Ары саржеле бла ауабыз. Анда адамла бизге болмагъанча жарыкъ тюбейдиле. Ингирде уа къонакъбайлагъа юлешедиле.

Экинчи кюн Шыкъы башында жайлыкълада лыжала бла учуп эришебиз. Илишан да атабыз. Артда элде китапханагъа да элтедиле. Анга «изба – читальня» дей эдиле.

Бир жол алайда жыйылып тургъаныбызлай, алашаракъ кишичик къатыбызгъа келип, барыбыз бла да саламлашып кетеди. Бизни бла алайда тюкенчи жаш бар эди. Аты да эсимдеди - Шауаланы Аубекир. Ол, бизге бурулуп: «Бу адамны таныгъаныгъыз бармыды?» - деп сорду. Биз: «Угъай» - дегенде: «Чегемли къарындашчыкъларым, ол аты айтылгъан Кязим хажиди!» - деп ышарды.

Аны башында ажаган бёркю, юсюнде тышланмагъан тону, белинде жюн жаулугъу, аякъларында уа кийиз чарыкълары. Чынтты таулу киши.

Сора жолундан артха къайыта келгенинде, ол бизни бла кёп хапар айтхан эди. Белгили революционер Къалабекланы Солтан-Хамитге кюй жазгъанын, Огъары Чегемде ырхы Акъболатланы Жакону юйюн басханын да эсгерди. Ол бизни эрттеден таныгъанча, шуёхча сёлеше эди.

Жети кюнню бизге къарагъан, шапалыкъ этип тургъан а Кязимни гитче жашы эди. Кетер кюнюбюзде уа бизни къошха элтип, анда Аналаны Байсолтаннга бир эркеч да сойдуруп, сыйлап ашырады. Ызыбызгъа бек къууанып къайытхан эдик.

Кете туруп биз да шыкъычыланы кесибизге чакъырабыз. Ала март айда келген эдиле. Биз аланы машина бла Булунгу башына элтебиз. Анда Гара суу къатында тууар союп сыйлайбыз. Той-оюн да этебиз.

Жашауумда жарсыулу, къууанч кюнлерим да болгъандыла, алай ол такъыйкъала уа эсимден бир да кетмейдиле. Сабийлигимде бек зауукълу кюнлерим ала эдиле сора уа!»