Ышаннгылы тенгинг жанынгда болса…

Хар инсанны да жашауунда бир мураты болмай къалмайды. Къашхатаучу Мокъаланы Муслим да сабий заманындан башлап Минги таугъа ёрлерге сюйюп ёсгенледенди. Алай бла бир  ненча кюн мындан  алгъа ол кесича ючеуленни къауумунда Элбурсну тёппесине чыгъып  тюшгенди.

КъМР-ни Альпинизмден бла туризмден федерациясыны президенти Ёлмезланы Абдул-Халим озгъан ыйыкъда Анастасия Литвиновагъа, Залим Кайсиновха, Ахмед Хачетловха эм Мокъаланы Муслимге Минги таугъа чыкъгъанларына шагъатлыкъ этген сертификатланы бергенди. Къауумну Элбрусха чыгъаргъан терс къолчу жаш Теммоланы Рустамгъа уа Ёлмез улу энчи ыспас этип, аныча жашлары болгъан халкъны тамблагъы кюню  барды,  деп  чертгенди. Ол да Абдул-Халимни къолундан шагъатлыкъ къагъытны алгъанды.

Жашланы алгъышларгъа уа Минги тауну этегине жууукълары, тенглери да келген эдиле. Белгили къобузчу Башийланы Фатима алагъа къарачай-малкъар халкъны гимни болуп къалгъан «Минги тауну» макъамы бла тюбегенди. Къызыу къарсла, жарыкъ кёллюлюг а жыйылыугъа бютюнда уллу къууат бергендиле.

Ёлмезланы Абдул-Халим, сертификатланы берирден алгъа кесини къысха сёзюнде, Элбрусха ёрлеуню  адамла бир затха жоралагъанларын эсге салып, ала уа бу жолоучулукъгъа не себепден чыкъгъанларын соргъанды. Таулу жашла, аз да сагъыш эте турмай, бу атламны аналарына  атагъанларын айтхандыла. Жыйылгъанла аланы ол сёзлерине къызыу къарсла бла тюбегендиле.

Ахырында ала барысы да Ёлмезланы Абдул-Халим бла суратха тюшгендиле.

Биз а аны бла чекленип къалмай, Теммоланы Рустам   эм Мокъаланы Муслим бла таугъа чыгъыугъа хазырланыу къалай баргъаныны юсюнден къысха ушакъ этгенбиз.

Мокъа улу айтханнга кёре, ол былтыр да таукел болгъан эди Элбрусха ёрлерге.

- Рустам къарындашым, не заманда да жол тамата болуп, мени ары элтирге хазыр эди. Алай мындан  бир жыл алгъа саулугъум бла байламлы муратыма жеталмагъанма. Быйыл а бир ыйыкъ чакълы мында туруп, тюрлю-тюрлю бийикликледе болуп, акклиматизацияны ётгенме. Бизни къауумгъа кирген башхала да ол халли. Гара-Башиде 3880 метр бийикликде бир ненча кюнню тургъанбыз, - дейди Муслим.

Теммоланы Рустамны юсюнден айтханда, ол Минги тауну тёппесин иги таныгъанлыкъгъа, жол кёргюзтюучю болуп профессионал халда ишлемейди.

- Къарындашым Муслим ючюн тебиреген эдим бу жол. Аны мураты толурун сюйюп. Быллай атламны этерни  аллында хазырланыуну магъанасы бек уллуду да, анга аслам эс бёлгенбиз. Акклиматизациядан сора да, жашланы кюч-къарыуларын игилендириу болмагъанча керекли затды. Аны себепли биз ала бла бу тийредеги бийикликлеге чыгъып, аланы жолгъа  алай хазырлагъанбыз, - дегенди Рустам.

-  Къарындашым сёлешип: «Кел, энтта да бир кёрейик»,- деп  айтып бошагъынчы, мен мында эдим, -деп кюледи Муслим.

- Рустам, быллай жумушха таукел болур ючюн,  саулукъдан сора, дагъыда не зат керекди?

- Тюзсюз, саулукъсуз бу ишде болмайды. Экинчиден а, мени оюмума кёре, жанынгда ышаннгылы тенгинг барса, жолунг да алай къыйын кёрюнмейди.

Алайды да, миллетибизни келечилери терк-терк  Минги тауну тёппесине чыгъып, чынтты таулула болгъанларын кезиулю кере кёргюзте, аналарыны да сыйларын кёре, атларын тарыхха жазгъанлары ёхтемлендиреди.