Кючюне къаллай законла киргендиле

Социал пенсиялагъа индексация, тютюнлени багъаларын тохташдырыуну низамы, товарлагъа маркаланы салыу – жылны аллындан бери  кючюне къаллай законла киргендиле.

1 апрельден социал пенсиялагъа 3,4 процентге индексация этилгенди. Бу ахча ишчи  стажы жетмей, страховой пенсия алмагъан инсанлагъа, сакъатлагъа тёленнгенин белгилерчады.

 Индексация пенсиячыгъа жашау этерге жетерик  ахчаны эки жылны ичинде ёлчемине кёре  саналады.  Алай бла ахча къошулгъандан сора социал пенсия къыралда орта эсеп бла 10 183 сом болгъанды.  

Электрон сатыу-алыу жаны бла законлада да бардыла тюрлениуле. Алай бла товарны жаланда бир компания чыгъаргъан кезиуде эмда аны  багъасы 3 миллиондан аз болса, комиссия къуралмайды. Къырал контракт женгиллетилген амал бла къабыл этиледи – анга жаланда электрон къол салынады.

  Апрельден башлап  электрон техникада россейли программала салыныргъа керекдиле. Смартфонлада,   планшетледе,   Smart TV телевизорлада, ноутбуклада, компьютерледе, ала 2021 жылда 1 апрельден сора чыгъарылгъан эселе, россейли ПО  болургъа тийишлиди. Ол тыш къыраллы продукцияны ата журтлу товарла бла алышыу программаны чеклеринде этиледи эмда къыралда цифралы технологияланы айнытыугъа себеплик этерикди. Жангы низам ата журлу компанияланы конкуренциягъа чыдамлы этерикди, деп акъыл этедиле законну авторлары.

 Тютюнню  багъасыны эм аз ёлчеми тохташдырылгъанды – андан учуз этерге жарарыкъ тюйюлдю.  Бу жангычылыкъ инсанланы саулукъларын сакълаугъа бурулупду. Законну авторларыны акъылына кёре, бу амал тютюнню чыгъарыу бла кюрешген жашырын предприятияланы ишлерин тохатыргъа, контрафакт продукцияны тыяргъа онг боллукъду.

 Дагъыда сырагъа аны муродорунда чыгъарылгъан суусунлагъа къырал марка салынып башлагъанды. Бу иш сынау халда этиледи эмда 2022 жылда 31 августха дери бардырыллыкъды.

 Россейде инвестициялагъа себеплик этер, бизнесменлени кёллендирир мурат бла «Капиталовложение» къырал информация система ишлеп башлагъанды.  Анда инвесторлагъа керекли билдириуле, жангылыкъла басмаланадыла. Системаны сайтында къырал эм муниципал болушлукъну мадарлары, бюджетден ахча къаллай жумушлагъа бёлюннгени да басмаланнганлай турлукъду.

Энтта бир жангычылыкъ.  Россейни Юстиция министерствосу экстремизмге къажау  законлагъа бузукълукъла этгенлери ючюн сюд органла жабаргъа  неда ишине чекле салыргъа деген оноу чыгъарылгъан организацияланы тизмесин къурайды. 

Отлукъ-энергетика комплексни объектлерин терроризмден къоруулау жаны бла жорукъланы бузгъанлагъа уа тазир салынырыкъды.  Аны ёлчеми 100-300 минг сомгъа дери жетерикди – объектни категориясына кёре.