Майдалла къыта, республикабызны байрагъын кётюртюп, халкъыбызгъа махтау келтиредиле

Спортну къайсы тюрлюсю да адамдан къарыу, заман, итиниулюк излейди. Ол анга берилгенлени уллу жетишимле, белгилилик бла саугъалайды, алай аны бла бирге уа чып тюшюу бла да къоркъуулуду. Алай миллетибиз ётгюр, тири, салгъан муратларына алжаусуз баргъан уланлары, къызлары бла байды. Бюгюн аланы бир къаууму бла сизни шагъырей этебиз.

Белгили штангачы Аккайланы Хаджимурат, ауур атлетика бла кюреше, 2004 эм 2008 жылладагъы Олимпиада оюнлада кюмюш эм доммакъ майдалланы къытханды. 2011 жылда дунияны чемпионатында хорлап, «World Weightlifting» журналны сайлауу бла дунияны эм иги ауур атлетчисине саналгъанды. Хаджимурат физкультураны эм спортну айнытыугъа салгъан уллу къыйыны, болдургъан бийик жетишимлери ючюн «За заслуги перед Отечеством»   орденни биринчи эм экинчи даражалы майдаллары бла саугъаланнганды. Бюгюнлюкде эришиулеге къатышмаса да, спорт бла кюрешиу аны жашау жоругъуча къалгъанды. Хаджимурат иги кесек заманны Ростовда жашайды, 2016 жылда Ростов областьны ауур атлетикадан федерациясыны президентине айырылгъанды.

Тырныауузчу гёжеф Заур Курамагомедов Лондонда Олимпиада оюнланы доммакъ призёруду, Россейни грек-рим тутушуудан эки кере чемпионуду, дунияны эм Европаны чемпионатларыны талай кере призёруду. Бир кесек заманны Заур эришиулеге къатышмай тургъанды, алгъаракълада уа белгили спортчу жангы хорламлары бла атын айтдыргъанды. Ол Адыгеяда Тахтамукайда алтын майдалны бла бел бауну къытханды. Ейск шахарда И.М. Поддубныйни хурметине аталгъан 47-чи эришиуде «кюмюшню» алгъанды. Заур Курамагомедов физкультура бла спортну айнытыугъа этген уллу къошумчулугъу, Олимпиада оюнлада бийик кёрюмдюлери ючюн «Ата журтну аллында жетишимлери ючюн» орденни экинчи даражалы майдалы бла саугъаланнганды.

Гуппойланы Алина  дзюдодан бла самбодан округ эришиуледе биринчи жерлеге чыкъгъанлай турады, къырал даражалы турнирледе майдалсыз хазна къалмайды, школда, университетде окъугъан кезиулеринде аланы  волейболдан командаларыны капитаны болгъанды. Владикавказда Север Осетия-Аланияны дзюдодан ачыкъ чемпионатында, тёрт сермешинден ючюсюн болжалдан алгъа хорлам бла бошап, ючюнчю жерни алгъанды. Ингушетияда СКФО-ну дзюдодан чемпионатында, декабрьни биринчи жарымында уа Нальчикде самбодан округ даражалы эришиуде хорлагъанды. Сумодан республикада бардырылгъан биринчи чемпионатда да алтын майдалны къытханды. Спортну Алина гитче заманындан бери сюйгенди, тёртюнчю классдан онунчугъа дери къол тюйюш бла кюрешгенди. Бюгюнлюкде ол республикабызны умутландыргъан дзюдочуларыны санындады, тренер болуп, сабийлени да юйретеди.

Гёжеф Локияланы Жамболат грек-рим тутушууда болдургъан жетишимлери бла белгилиди. Спорт бла жети жылында кюрешип башлагъанды, биринчи уллу хорламы 2011 жылда Россейни кадетлени араларында биринчилигинде къытхан доммакъ майдалы эди. Эки жылдан ол къыралны юниор биринчиликлеринде кюмюш эм доммакъ майдалланы алгъанды. 2015  жылдан бери Россейни чемпионатларында, Иван Поддубныйны мемориалында алчы жерлеге дайым чыкъгъанлай турады, Европалы, халкъла  аралы, дуния даражалы эришиуледе хорлагъанланы санына кирмей къалмайды. Дунияны кёп тюрлю шахарларында бола, Жамболат барындан да бек туугъан жери Тырныауузну багъалайды. Адамлада уа эм магъаналы шартлагъа кертичиликни, кёзбау этмей бир бирден файда тюшерин излемей, таза жюрекден шуёхлукъ жюрюте билиуню санайды.

Жаш спортчу Чочайланы Амина атын женгил атлетикада айтдыргъанды. Ол Россейни 20 жыллары толмагъан спортчуланы араларында бардырылгъан биринчилигинде алтын майдалны къытханды. 200 метрге эм 2000 метрге чырмауланы юслери бла чабыуда 500 башха атлетден аны озгъан чыкъмагъанды.  Амина 2002 жылны 31 майында Москвада туугъанды, 2014 жылда къарындашла Знаменскийлени атын жюрютген спорт школгъа  женгил атлетикадан секциягъа жюрюп башлагъанды. Жараууну биринчи кюнлеринден окъуна таулу къыз хорламгъа итиниулюгю бла энчи болгъанды. Аны ючюн къадалып кюрешгени уа кёп жетишимлеге келтиргенди – 18 жылында Амина Россейни спортуну устасыды.

Мусукаланы Исмайыл а алгъаракълада, спорт  гражданствосун тюрлендирип, Венгриягъа кёчгенди. Тыш къыраллы команданы санында дунияны чемпионатында тутуша, ол доммакъ майдалны къытханды. Алай бла Исмайыл Токиода боллукъ Олимпиадагъа къатышыргъа эркинликни къоруулап къууандыргъанды. Ары дери Мусука улу Польшада эркин тутушуудан «Вацлава Циолковскийни мемориалы» деген халкъла аралы турнирде доммакъ майдалгъа ие болгъанды. Алгъа жыллада ол юниорланы араларында дунияны биринчилигини, Иван Ярыгинни атлы турнирни, призёрларыны санына киргенди, Европаны биринчилигинде хорлагъанды, Россейни чемпионатында экинчи жерни алгъанды. Россейни былтыргъы чемпионатында Исмайыл экинчи жерге чыкъгъанды, континентле аралы кубокда биринчи болгъанды.

Къойчуланы Джамиляны жюреги уа таэквондогъа  тартханды. Ол, аз заманны жарау эте, тренерине, жууукъ-тенглерине да хорлаяллыгъын, фахмусу болгъанын кёргюзталгъанды. Юйюрюнде Джамиля музыка бла кюреширин сюйюп, музыка школгъа бередиле. Анда окъуудан юйге бара, ол, спорт залгъа къайтып, анда эшикни кирит этилген тешикчигинден сабийле таэквондо бла кюрешгенлерине къарай тургъанды. Аланы ариу акъ кимонолода приёмланы этгенлерине сукъланнганды, бу итиниулюгю жюрегине тынчлыкъ бермегенди. Ата-анасындан эркинлик алгъандан сора  аллай бир термилген жараууна баргъанды, жетишимле да кеслерин сакълатмагъандыла - Пятигорскда ЮФО-ну чемпионатында кюмюш майдалны къытханды, Майкопда Россейни жаш тёлю спартакиадасында ючюнчю жерге чыкъгъанды, энчи иели школланы араларында бардырылгъан турнирде «алтынны» алгъанды. Таэквондону аскер, олимпиада тюрлюлери бла Джамиля алты жылны кюрешгенди. Жарсыугъа, чып тюшюп,  спортдан кетерге тюшгенди. Джамиля Искусстволаны Север-Кавказ къырал институтунда продюсерге окъугъанды, «Къабарты-Малкъар» телеканалда режиссёр болуп ишлегенди. Бусагъатда Москвадады, умуту халкъланы, аланы адет-тёрелерини юсюнден документли фильмле алдырыргъады.

Бюгюнлюкде умутландыргъан каратечилерибизден бири Ностуланы Исламды. Ол Москвада «Щитовну кубогу» деген ат бла каратени кёкусинкай тюрлюсюнден битеукъырал эришиуде алтын майдалны къытханды. Бу турнир а даражасы бла Россейни чемпионатына тенгди. Исламны анда хорламыны энчилиги уа кеси 63 килограмм болгъанлыкъгъа, 80 килограмм ауурлукъ къауумда сермешгениндеди. Ол анда битеу да 4 тюбешиу бардыргъанды, ачыгъанына, къаршчы спортчуладан иги да женгил болгъанына къарамай, алгъа чыкъгъанды. Исламны дагъыда уллу жетишимлеринден бири Москвада «Киокушинкай-каратеден федерацияланы содружестволарыны кубогу» деген III халкъла аралы эришиуде эки саугъа къытханыды, анда жерлешибиз доммакъ майдалны алгъанды, сора эм терк нокаут этгени – 5 такъыйкъаны ичинде - ючюн да энчи белгиленнгенди. Ислам кёп округ, къырал даражалы эришиуледе хорлай келеди, Россейни жыйымдыкъ командасыны санындады.

Кёп болмай эркин тутушуудан Россейни чемпионатындан «алтынны» Шауаланы Малик келтиргенди. Ол, 79 килограммгъа дери ауурлукъ къауумда тутуша, финалда Дагъыстанны келечиси Ахмед Усмановдан кючлю болуп, биринчи жерни алгъанды. Спорт бла Малик 12 жылны кюрешеди, залгъа аны эм алгъа тамата къарындашы келтирген эди, артда уа жарауну кеси да жаратханды. Чемпионатны юсюнден айта, Малик анда тёрт  тюбешиу бардыргъанын, аладан экисин болжалдан алгъа хорлам бла бошагъанын билдиргенди. Хар спортчуча, Малик эришиуню аллында кесин хорламгъа кёллендиреди. Гёжеф тренерини, кесини да къыйыныны багъасын  чыгъарыргъа борчлуду, дейди.

Хорламлары бла дайым белгили гёжеф Тюменланы Альберт къууандырады. Спорт бла Альберт беш жылындан бери кюрешеди. Ал кезиуледе Альберт каратеден жарау этгенди, спортну бу тюрлюсюнде жетишимли да болгъанды. Бир-бир кезиуледе анга аскер самбо бла боксха да эс бурады, алай сайлауун а  аскер къол тюйюшге  береди, халкъыбызны атын анда хорламлары бла айтдырады. ММА-да тренери уа атасы Тюменланы Хусейн болады. Мында кёп кере къытханындан сора анга UFC-де эс бурадыла, аны чегинде биринчи сермешин Тюмен улу Бразилияда Ильдемар Алькантар бла бардыргъан эди. Бу лигада Альберт беш сермешде къытханды.