Бийик излемлеге келиширикди мектеп

Нальчикде Горный микрорайонну огъары жанында республикада эм уллу боллукъ орта школну къурулушуну юсюнден газетибизде  жаза туруучубуз. Белгилисича ол билим бериу жаны бла эм бийик излемлеге келишген учреждение боллукъду, кеси да тёрт блокдан къураллыкъды. Анда  эки спортзал, аллай бир бассейн, футбол, волейбол, баскетбол эм женгил атлетика майданчыкъла, хореография зал, ашхана, физика, химия, биология лабораторияла, лингафон кабинетле, мастерскойла боллукъдула. Къоркъуусузлукъну жалчытыугъа, ол санда от тюшюуден, террорчулукъдан сакълаугъа да энчи эс буруллукъду.
Проектге кёре школда видео къарау системала хайырланыллыкъдыла, таза суу эмда электрокюч бла жалчытхан энчи оборудование да орнатыллыкъды. Жылыу бла  энчи котельня жалчытырыкъды, дагъыда аны кесини трансформатор подстанциясы боллукъду. Саулай алып айтханда, анда 1224 сабий окъурукъду.
Объектде къурулуш хар кюн сайын тохтаусуз барады. Сууукъла келгенликге анда шёндю да иш къазауатды. Подряд организацияны специалистлери аны мурдорун онекиметрлик бетон чыпынладан къурагъандыла, ток эмда суу ызланы тартхандыла. Эки блокну къабыргъаларын ючюнчю этажгъа дери къалап бошагъандыла, энтта да экисин а экинчиге дери тамам этгендиле. кючлери 3600 киловаттха жетген эки тынгылы котёл орнатыла турады, 630 кВА кючлю эки трансформатор хайырланыргъа берилгенди, деп билдиргендиле КъМР-ни Къурулуш эмда жол мюлк министерствосундан.