Биржа активлеге сурам ёседи

Москваны биржасыны кёрюмдюлерине тийишлиликде Къабарты-Малкъарда жашагъанла быйыл октябрьны ахырына анда тогъуз минг энчи инвестициялы счёт ачхандыла. Битеу да бирге Шимал Кавказ федерал  округда уа аланы саны 94 минг болады, -дегенди Россейни Банкыны Къабарты-Малкъарда бёлюмюню башчысыны орунбасары Балаланы Расул.

- Бюгюнлюкде кёрюмдюлеге къарасакъ, бизни республика округда энчи инвестициялы счётланы саны бла ючюнчю жерге кётюрюлгенди. Октябрьде аланы иелерини саны беш жюзге кёп болгъанды.  Бу счёт тёрели банк вкладдан эсе уллуракъ файда келтиреди, аны ючюн тёленирик налогну уа бир кесеги артха къайтарылады. Аны бир жыллыкъ ёлчеми 50 минг сом бла чекленеди.

Банкда айтханларыча, инвестициялы счётну талай кемчиликлери да бардыла. Сёз ючюн, ол къырал страхование этиу системагъа кирмейди.

Эсигизге салайыкъ, быллай счётланы ачаргъа эркинлик 2015 жылдан берилип башланнганды. Энчи инвесторда аллай жаланда бир счёт болургъа боллукъду. Аны брокер бла неда лицензиясы болса управляющий компания бла ачаргъа боллукъду.