Ачыкъ жюрекли тёлю

Республикабызны миллет китапханасыны юбилейи бла байламлы бюгюн мен халкъыбызны анда кёп жылланы ишеп кетген келечилерини юслеринден хапарлагъа сюеме.

Анала, балаларына алгъыш айта: «Айланнган жолунгда жаланда керти адамлагъа тюбей-тюбей тур», - дерге къачан да ёч болгъандыла. Меникини ол тилеги уа толусунлай къабыл болгъанды. Миллет библиотекагъа ишге тохташханымда, къадар мени аллай адамла бла тюбешдиргенди. Биттирланы Любовь, Афашокъаланы Шамса, Геляланы Халимат, Бачиланы Сакинат, Батчаланы Лиля. Ала барысы да республиканы ара китапханасында кёп жылланы ишлеп кетгендиле. Аланы элледе, шахарлада жашагъанла да уста таныгъандыла. Жарсыугъа, бюгюнлюкде бизни арабыздан Геляланы Халимат бла Бачиланы Сакинат (жаннетли болсунла) кетгендиле.

Ол тиширыуланы ачыкъ жюреклиликлери мени бюгюн да сейирсиндиреди. Ары ишлерге жангы келгенлеге ала кеси адамларынача жылыу бла тюбегендиле. Юйретирге, билимлеринден юлюш чыгъарыгъа эринмегендиле. Ариу сёзлени бир заманда да къызгъанмагъандыла. Керек болса уа, кеси эгечлеринеча, кемчиликлеринги да кёргюзтюп, къалай тап боллугъун ангылатхандыла. Биз, шёндюгюле, жарсыугъа, алача тюйюлбюз.

Аланы хар бирини да энчи халлери бар эди. Болсада бирикдирген кезиуле да аз тюйюл эдиле. Любовь Супьяновна бла Шамса Исхаковна аталарын танымай ёсгендиле. Ала Уллу Ата журт урушда жоюлгъандыла. Сабийлей кёчгюнчюлюкню сынагъандыла. Ата жылыуун Геляланы Халимат да билмегенди. Алай аны эсинде Туркестанны кирли суулары сакъланнган эдиле…

Биттирланы Любовь, Бачиланы Сакинат, Батчаланы Лиля эм Тетууланы Шарифа Москвада Культура институтну библиотека факультетин бошагъан эдиле. Афашокъаланы Шамса бла Геляланы Халимат а – КъМКъУ-ну. Алай аланы барысыны да китаплагъа сюймеклик бирикдиргенди деп, таукел айтыргъа боллукъбуз. Аллай къаллай бир адамгъа билим алыргъа болушханларын айтып бошаргъа да къыйынды. Китапханагъа келиучюле алагъа ыразылыкъларын хаман да билдиргенлей тургъандыла. Тёзюмлюлюклери, ишлерин уста билгенлери, ачыкъ жюреклиликлери бла кёп миллетли коллективде ала сый-намыс таба ишлегендиле.

Ол тёлюню бир энчи шарты барды десем, ётюрюк болмаз: ала бир бирлери бла шуёхлукъну къаты жюрютгендиле.  Байламлыкъларын бюгюн да тас этмегендиле. Бизге да хаман сёлешгенлей турадыла. Сёз ючюн, Зоя Пшиншева Израилге бла Москвагъа кёчгенлени саламларын бизге сууутмай жетдиреди. Аралары узакъ болгъанлыкъгъа, ала бир бирлерин тансыкълайдыла, байрамла бла алгъышлайдыла.

Дагъыда таулу къызла бирге китапханада кёп жылланы Тамара Мисакова, Тамара Нашапигова, Тамара Теважукова, Нона Шимкович, Лиза Кясова, Зина Павлова, Зоя Бекулова, Галина Игонина, Ася Тутукова, Ира Галкина, Мила Ягудаева да уруннгандыла. Ала барысы да республикада жарыкъландырыу ишни айнытыугъа уллу къыйын салгъандыла.