«Эм уллу муратым атамы-анамы, халкъымы тийишли уланы болургъады»

Къабарты-Малкъарда айтхылыкъ спортчула не заманда да аз тюйюл эдиле. Аланы асламысы, дуния рекордла салып, белгили болгъандыла.  Миллетибизни атын айтдыргъан спортчуларыбыздан бири уа Аттасауланы Рамазанды.  

Рамазан 1999 жылны  31 июлюнда  туугъанды. Ол Черек районда Къашхатау эм Бабугент элде уллу юйюрде ёсгенди. Спорт бла тири кюрешип башлагъан заманындан а, Нальчикни 8-чи номерли орта школуна кёчюп, шахарда жарау этип тебирейди.  Тутушуу бла ол 5-6 жылында кюрешип башлагъанды. Биринчи тренери Уяналаны Азрет болгъанды. Абаданыракъ кезиуюнде уа Бёзюланы Исхакъ юйретгенди, ол кетгенден сора жарауну Закре Желдашевде бардыргъанды. Аланы хар бири да ал кезиуледе уллу къошумчулукъ этгендиле, деп чертеди гёжеф. 

 Школну 9 классын бошагъандан сора  2015 жылда Рамазан Америкагъа окъургъа кетгенди.

Анда Бостон шахарда  Wayland hiqh school школа юч жыл окъугъанды. Ол бюгюнлюкде Американы  жыйымдыкъ командасында биринчи тизмедеди. Аттасау улу кёп даражалы турнирледе бла чемпионатлада хорлай келеди. Ол къатышхан ахыр эришиулеринден бири Американы чемпиону деген ат ючюн эди. Анда таулу жаш, «алтын» ючюн сермешде алчылыкъны жибермей, чемпион атха тийишли болгъанды.

Шёндю Аттасау улу Америкада жашайды. Спортдан башха да къырал университетлеринден биринде бизнес жаны бла окъуйду. Жашауда жаланда спортха берилмей, окъууда да уллу жетишимлеге термиледи.

- Американы къуру спорт ючюн угъай, башха затла ючюн да сайлагъанма. Мында кесими жашау жолуму табаргъа онгла кёбюрек болгъаны ючюн тыш къыралгъа кетерге амал чыкъгъанлай, жолгъа тебирегенме. Таныш адамларым да бар эдиле да, ол да себеплик болгъанды. Сора, мында «iowa state university» белгили университетинде окъуйма,  - дейди ушакъ нёгерим.

Америкада жарау этип башлагъанлы Рамазан кёп сыйлы эм белгили турнирлеге къатыша тургъанды. Алай бла къайсы эришиу эсинде бегирек къалгъанын кеси айтады. «Хар турнирге да энчи эс буруп хазырланама. Алай бек эсимде къалгъан турнир а буруннгу жыл Американы чемпиону болгъан турнирди. Анда хорлар ючюн, мен уллу къыйын салгъанма эм кесими аямай кёп жарау этгенме», - деп чертеди спортчу.

Рамазанны эм уллу муратларындан бири ол Олимпиаданы оюнларыдыла. Ары дери уа, дунияны чемпионатында хорлар умутлуду.

- Спорт жетишимледен башха да, башха кёп умутум кёпдю, аладан эм уллусу уа  ол атамы-анамы, халкъымы тийишли уланы болургъады. Аланы кесим ючюн башларын энишге ийдирмесем, кесими уллу жетишимлеге жетген сунарыкъма, - деп белгилейди Рамазан.

Бусагъат заманда социал сетьле бла да хайырлана, ёмюрде кёзюнг кёрмеген адамланы жашауларына къараргъа онг барды. Алай бла Рамазан да интернет бла хайырланады, анда кесини страницасы барды. Ёсюп келген жаш тёлю анга къарап, кесине юлгю да алады. Тыш къыралда башха миллетлени ичинде жашап, жарау этиу, бийик билим алыу да кёплеге ахшы юлгю болады.

- Мени оюмума кёре, жашауда адам эталмазлыкъ зат жокъду. Ол себепден бир затдан да къоркъмай, бир затны да артха салмай, муратынга барыргъа керекди. Ол заманда ишинги эсеплерин да кёрюрге онг боллукъду, - дейди ушакъ нёгерим.

Аттасауланы Рамазан, Аллахны болушлугъу бла, адам эталмазлыкъ зат жокъду деген жорукъ бла жашайды.