Школчулагъа Басхан-ГЭС-ни кёргюзтгендиле

Исламей элни ючюнчю номерли орта школуну тогъузунчу классда окъуучулары Басхан-ГЭС-де экскурсияда болгъандыла. «РусГидро» компанияны республикада бёлюмюню пресс-службасындан билдиргенлерича, ол усталыкъ сайларгъа себеплик этиу ишни чеклеринде бардырылгъанды.

Школчулагъа тамата мастер Аслан Хацуков тюбегенди. Ол станцияны тарыхыны, энчиликлерини, мекямларыны юслеринден кёп хапар айтханды.

Къонакъла машинала орналгъан залгъа да киргендиле. Анда юч гидроагрегатны кёргендиле, къалай ишлегенлерин эмда станцияда ара пультдан битеу гидротехникалы комплексге къалай оноу этгенлерин да билгендиле. Экскурсияны уа КРУЭ мекямны къатында бошагъандыла. Ол станция чыгъаргъан электрокючню андан ары жиберген устройстводу.

«Сабийле экскурсияны бек жаратхандыла. Биз мында кёрген, эшитген затларыбызны физикадан эмда математикадан устазла бла тийишдирирге кюреширикбиз. Сау болсунла энергетикле бизге быллай онг бергенлери ючюн», - дегенди ол школну башчысы Ирина Каскулова.

Энергетикле уа сабийлени къуру къоллары бла жибермегендиле: хар бирине да «Электроплан» деген китапла бергендиле. Аны уа «РусГидро» компания «Сабий китапны юйю» Фонд бла бирге басмалагъанды. Аны бетлеринде гидростанцияла, геотермал, жылыу, кюн электростанцияла орналгъан регионланы юслеринден жазылады. «Электроплан» ток къалай чыгъарылгъаныны, ол эмда аны сакълау жаны бла шёндюгю дунияда къаллай амалла болгъаныны юслеринден хапарлайды.