Къайтарылмаз ючюн – унутмазгъа

Тюнене  Нальчикни  солуу  паркында  «Ёмюрлюк отну» къатында  «Блокадалы ётмек» деген ат бла  акция бардырылгъанды. Ол Уллу Ата журт урушну  кезиуюнде Ленинград  къуршоудан эркин этилгенли 80-жыллыгъына  жораланнганды. Аны  КъМР-ни  Жаш тёлюню ишлери жаны бла министерствосуну себеплиги бла  «Хорламны волонтёрлары», «Жаш тёлю ара», Россейни сабийлерини бла жаш  тёлюсюню «Биринчилени къымылдауу» деген къауум къурагъандыла.

Майданда уллу экран тагъылыпды, бир жанында уа столда базман, волонтёрла аны юсюнде ётмекни тартып бередиле. Ол 125 граммдан кёп  болмазгъа  керекди. Уруш жылланы жырлары да эшитилгендиле. Хорламны волонтёрлары къуршоу  баргъан 872 кюнню ичинде болгъан ишлени юслеринден  тарых шартланы бла  материалланы  юлешедиле.

Сагъат онеки болургъа, къыш  сууугъуна да къарамай, алайгъа  кёп адам келгенди. Аланы араларында  урушну эмда урунууну ветеранларыны шахар советини   председатели Абдуллаланы Мустафа, КъМР-ни Башчысыны кенгешчиси  Николай Миронов,  «Единая Россия» политика партияны республикалы бёлюмюню,  жамауат араланы   келечилери,  окъуучула,   кадетле, юнармеецле да бар эдиле.

Россей Федерацияны гимни согъулады.  Аны ызындан а  метроном эшитиледи.  Акцияны бардыргъан Лина Мафедзова  аны магъанасыны юсюнден айтады. «Бу таууш  кюн сайын да эшитилгенди. Ол  Нева черекни жагъасында жашагъанлагъа, бир кесек болса да, тутхучлулукъ эди».                 

Жыйылгъанланы аллында  сёлеше, Абдуллаланы Мустафа  Ленинграддан кёчген бир юйюр эки жылны Кёнделенде тургъанын, алагъа эллиле  кеслери къыйналгъанларына да къарамай, кёз-къулакъ болуп тургъанларын да айтханды.  Ленинградчылагъа душман жетдирген азаплыкъны  унутургъа жарамазлыгъын да эсгертгенди.

Совет Союзну Жигити, Ленинградны къоруулаугъа тири къатышхан Хасан Ивановну жашы  Валерий блокаданы заманында туугъанын, анда болгъан халны юсюнден атасы бла анасындан эшитгенин  айтханды. 

Нальчикде 33-чю номерли  мектепни окъуучусу, жаш тёлю къымылдауну биринчи съездине къатышхан  Антон Стегайло да сёлешгенди. «Эр кишиле жилямайдыла, болсада  ачы затланы кёрселе, эшитселе, ала да тёзалмайдыла.  Быллай тюрлю ишле  жюрегими къозгъамай къоймайдыла. Тамагъыма  тыгъыладыла жилямукъларым.  Адам улу болуп кетген къыйынлыкъланы унутса, ол тарых жангыдан къайтмай къаллыкъ тюйюлдю. Аны ючюн урушда ёлгенлени атларын унутмазгъа керекбиз!», – дегенди. 

Николай Миронов жыйылгъанланы республиканы оноучуларыны атындан алгъышлап, Ленинградда туугъанын, анда жашагъанын да билдиргенди. Ол айтханнга кёре, аны аппасы бла ыннасы ол шахарны гитлерчи фашистледен эркин этер ючюн жанларын бергендиле, атасы бла анасы уа  блокадалы жыллада ачлыкъ, жаланнгачлыкъ да сынагъандыла. «Бизни юйюрюбюз бюгюн да   ётмекни хар  бурхучугъун   сыйлы кёрюп, аны  бир заманда да атмагъандыла»,- дегенди. 

Ол быллай кезиулени эсгериу ишле  РФ-ни битеу шахарларында да бардырылгъанларын айтып,  ала ёсюп келген тёлюню патриот ниетде юйретиуге  уллу себеплик этгенлерин чертгенди. Аланы къурагъанлагъа, алагъа къатышханлагъа  да  ыспас этгенди. 

Андан сора  кадетле назмула айтхандыла, жаш адамла да жырлагъандыла. Экранда уа  «Блокадалы Ленинград» деген ат бла документли фильм кёргюзтюлгенди.

Акцияны ахырында уа  алайгъа келгенле «Ёмюрлюк отну» эсгертмесине гюлле салгъандыла.