Къабарты-Малкъар – айырмалыланы санында

Бу кюнледе Москвада Росздравнадзорну башламчылыгъы бла онбешинчи илму-практика конференция ишин бардырады. 

Жыйылыуну ача, РФ-ни саулукъ сакълау министри Михаил Мурашко бюгюнлюкде жамаутны саулугъун сакълаугъа, кючлеуге къыралны жанындан аслам эс бурулгъанын билдиргенди. Ол санда  медицина болушлукъ качестволу эм къоркъуусуз болуруна да. 

Ол кюн кеслерин айырмалы кёргюзтгенле ведомствону дипломларына тийишли болгъандыла. Аланы арасында  Къабарты-Малкъарны Саулукъ сакълау министерствосу да бар эди. Жерлешлерибиз «Коронавирус инфекция (COVID-19) кезиуюнде жамауатны саулугъун сакълау жаны бла  жетишимлери ючюн» номинацияда «Тынгылы эм къоркъуусуз медицина болушлукъ тапдыргъанлары ючюн» премия бла саугъаланнгандыла. Аны къууанч халда  Росздравнадзорну башчысына Алла Самойловагъа буюргъандыла.  

КъМР-ни саулукъ сакълау министри Рустам Калибатов пандемияны кезиуюнде оператив халда проблемалагъа эс бургъанларына эм болушлукъ тапдыргъанларына РФ-ни Саулукъ сакълау министерствосуна эм республиканы таматаларына да ыразылыгъын билдиргенди. Бютюнда  ол медицина ишчиле салгъан къыйынны энчи белгилегенди.

- Бу бизни барыбызны да жетишимибизди. Коронавирус жукъгъан аурууну къорууларча медицина организацияланы эм профильли ведомствону да   ишчилери кючлерин аямай бирлешип кюрешгендиле, - деп къошханды Рустам Михайлович.

 Конференцияны ишине къыралны 85 субъектинден власть органланы, саулукъ сакълау бёлюмню, кесибизни эм тыш къыраллы экспертле да къатышадыла.