Футболдан, шахматладан да зауукълу эришиуле

 «РусГидро» обществону регионда бёлюмюню болушлугъу бла Нальчикде гитче футболдан, шахматладан, чабыудан, велосипедледе учуудан эришиуле бардырылгъандыла. Алагъа спорт-адаптив школдан бла жай лагерьледе солугъан 500-ден аслам сабий къатышхандыла. Аланы барысына да кубокла, майдалла бла саугъала берилгендиле. Гитчелеге, ол санда сакъатлыкълары болгъанлагъа, быллай байрамны къураргъа  себеплик этгени  ючюн филиалгъа ыразылыгъын Къабарты-Малкъарны Олимпиада советини президенти Александр Заруцкий билдиргенди.

Общество жыл сайын жандауурлукъ программасыны чегинде сабий спортну айнытыугъа эс бёледи. Быйыл ол  Черек районну 1-чи номерли спорт школуну техникасын  жангыртыугъа, Аушигерде мектепни спорт залыны ремонтуна, республиканы баскетболдан жыйымдыкъ командасына Россейни чемпионатына барыр ючюн  кийимле алыргъа эм футболдан А.Л. Апшевни хурметине  турнирни ётдюрюрге болушханды.