«Ёлюмсюз полкну» магъаналылыгъы ёсе барады

Къабарты-Малкъарда 9 майда «Ёлюмсюз полк» тёрели халда ётерикди. Аны юсюнден КъМР-ни Башчысы Казбек Коков кесини телеграм-каналында билдиргенди. Ол республиканы жамауатын «баш магъаналы байрамгъа келирге эмда акциягъа бирге къатышыргъа» чакъыргъанды.

«Кёп да бармай биз Уллу Ата журт урушда Хорламны 77-жыллыгъын белгилерикбиз. Бу ишни магъанасы бла деменгилилиги жылдан-жылгъа кюч ала, кенгере барады»,-деп айтылады билдириуде.

«Хар юйюрде да болгъандыла урушха къатышханла, Ата журт ючюн жигитча сермеше ёлгенле да. Ол къанлы къазауатдан къайтханла уа къыралыбызны аягъы юсюне салгъанлары бла къалмай, ол битеу дунияда да бек кючлюге саналырча даражагъа жетдиргендиле аны. Биз кёпмиллетли халкъыбызгъа мамырлыкъны эмда чууакъ кёклю келир заманны саугъалагъан жигитлерибизни  бир заманда да унутурукъ тюйюлбюз, алагъа баш урабыз. Аланы хар бири эсибиздедиле. Жигитликлерини юсюнден билебиз. Ала унутулмазча этиу бизни барыбызны да сыйлы борчубузду», - деп чертгенди Къабарты-Малкъарны Башчысы.

«Къабарты-Малкъардан фронтха 70 мингден аслам адам кетгенди, аладан 12 мингден асламы  тюрлю-тюрлю  орденле  эм майдалла бла саугъаланнгандыла, 33 адамгъа Совет Союзну Жигити деген ат берилгенди, алтаулан Махтаулукъну орденини кавалерлери болгъандыла», - деп белгиленеди билдириуде.  

«Быйыл 9 майда Къабарты-Малкъар Республикада «Ёлюмсюз полк» биз термилип сакълагъан очный халда ётерикди – эпидемиология болум аллай онг береди.  Мени алгъаракълада этген буйругъума кёре барыбызгъа да магъаналы болгъан бу ишге хазырланыу башланнганды. Нальчикни баш орамында Хорламны келтиргенлени туугъанлары бла туудукълары жигит аталарыбызны бла аппаларыбызны суратларын бийик кётюрюп ётерикдиле»,- дегенди Казбек Коков.