Газетибизни багъалай билейик

Мени 102-чи жылым барады. Кесими таныгъанлы «Заман» газетни жаздырама. Заманла тюрленнгенча, бизни ана тилибизде чыкъгъан газет да, аны жарашдырылгъаны, материалларыны магъаналары да тюрленнгендиле. Журналистле да кёбюсюнде бюгюннгю заманны излемине кёре жазадыла. Болсада  газетни бетлеринде, алгъынча, халкъны, республиканы,тарыхны, къыралда, дунияда да не бола тургъаныны юслеринден статьяла, андан сора да, туугъан журтну сюерге, адет-намысны тутаргъа, сакъларгъа, иш кёллюлюкге, Къабарты-Малкъарны къолайлыгъын ёсдюрюрге чакъыргъан материалла басмаланнганлай турадыла. Аланы къайсы бирин да сюйюп окъуйма.

Жазгъанларына къарасанг, газетни журналистлери окъуулу, билимли адамладыла. Халкъны бай тилин уста хайырланадыла. Мусукаланы Сакинат, Текуланы Хауа, Холаланы Марзият, Османланы Хыйса, Мокъаланы Зухура, Жангуразланы Нажабат, Тикаланы Фатима, Таппасханланы Аминат, Байсыланы Марзият – къайсы бирин айтайым, барысыны да жазгъанларын сюйюп окъуйма. Аланы жазгъанларында адамны терен сагъышландыргъан оюмла кёп тюбейдиле. Баш редактор Къонакъланы Хасан, жаш адам болгъанлыкъгъа, ишин бардырады. Барыгъызгъа да ыспас, бюсюреу береме.

Газетни алмайбыз, анда жазылгъанны ангыламайбыз, заманынгы къоратып окъурча материалла да жокъну орунундадыла, дегенлеге сейир этеме. Ала газетни жаздырмаз ючюн этедиле аллай болмачы сылтауланы. Аланы асламысы газетни окъумагъанларына, анда не жазылгъанын да билмегенлерине, билирге да сюймегенлерине ишексизме. Да сора, бир айтыгъыз,  аллайланы не таулулукълары барды? Аллайлагъа «ай хомухла» деп айтыргъа жыл саным эркин этеди. Келигиз, маржа, хар бир таулу юйюр «Заманны» жаздырайыкъ, туугъан-туудукъну аны сюерге, окъургъа юйретейик! Юйде кеси тилибизде чыкъгъан газетни кёрюрге юйреннген сабий, бир кюн болмаса да, башха кюн къолуна алып окъур. Ол  аны ёз тилин сюерге биринчи атламы болур.

Миллетибизни, ана тилибизни багъалатханла, сау болсунла, газетге къайгъырадыла, аны кеслери алгъанлары бла къалмай, къоншугъа-тийреге да жаздырыр жанындан бек кюрешедиле. Редакцияда ишлегенле да, халкъыбызны тили сакъланыр ючюн къайгъырыу бла чекленип къалмай, сау болсунла, аны бизге сюйюдюрюр мадарла этгенлей да турадыла. Газет мындан ары да ёсюп келген тёлюню не жаны бла да байыкъландыргъанлай турлугъуна ишексизме. Аны себепли уллу башым бла барыгъызгъа айланып, былай айтыргъа сюеме: жангыз газетибизни кесибиз багъаламасакъ, киши да багъаламаз.  

Кеси жерибизден зор бла кёчюргенлеринде окъуна ариу тилибизде къалай сюйюп, ёхтемленип сёлешгенибиз эсимдеди. Бизни тилибизден бай, ариу тил дунияны башында да болмагъанын ангылатыр кереклиси болмаз. Алай аны ангылагъанла аздан-аз бола баргъанлары мени бек жарсытады. Аппала, аммала да туудукълары бла бир юйде жашап, ала бла орусча сёлешгенлери нек аламат кёрюнюп къалды?

Кесибизден  кёп зат къалады, жамауат. Тамбла кеч болурму аны юсюнден айтыргъа, келигиз бюгюн сагъышын этеийк!