Битеуроссей олимпиадагъа къатышырыкъдыла

Тамата класслада окъугъан 12 школчубуз Къабарты-Малкъарны Битеуроссей олимпиада да кёргюзтюрюкдюле. Ала регионда бардырылгъан эришиулени хорлагъандыла, аны бла бирге финалгъа тюшерча кереклиси тенгли бир балла алгъандыла. Битеу да республикалы даражада  53 школчу олимпиада да хорлагъандыла.

Эришиулени ахыр кезиую 18 мартда башланнганды, анга битеу къыралдан алты мингден аслам сабий къатышады, деп билдиргендиле республиканы оноучусуну пресс-службасындан.

Республиканы интеллектуал къарауда 12 предметден 9-чу, 10-чу эм 11-чи класслада окъугъанла кёргюзтюрюкдюле: Нальчикни экинчи лицейини окъуучусу Къудайланы Тамерлан, Нальчикни фахмулу сабийлери окъугъан лицейини окъуучусу Идар Сокуров,  Нальчикни бешинчи мектебини окъуучусу Ислам Каров, Огъары Акъбашны школуну окъуучусу Алина Фиапшева, Нальчикни фахмулу сабийлери окъугъан лицейини окъуучусу Сюзанна Псху, Прохладный шахарны ючюнчю лицейини окъуучусу Вячеслав Голубничий, Нальчикни тогъузунчу школуну окъуучусу Динара Ахмеджанова,  Нальчикни  жыйырма жетинчи  мектебини окъуучусу Лаура Тукова, Куба-Таба элни биринчи школуну окъуучусу Алина Тохтамышева, Нальчикни тёртюнчю гимназиясыны окъуучусу Абдурахман Хамгоков, Нальчикни ючюнчю школуну окъуучусу Арнэла Лигидова.

Окъуучуланы Битеуроссей олимпиадалары 4 кезиуге бардырылады: школ, муниципал, регион эм финал эришиуле. Алада хорлап алгъан дипломла эм алчы жерлеге тийишли болгъанла тёрт жылны ичинде россейли вузлагъа  окъургъа киребиз деселе, олимпиада да хорлагъан предметледен экзаменлени бермейдиле.

 Эсигизге салайыкъ, КъМР-ни Башчысы Казбек Коков озгъан жылда школчуланы битеуроссей олимпиадаларында хорлагъанлагъа, алчы жерлеге тийишли болгъанлагъа эм ана тилден бардырылгъан республикалы олимпиадалада хорлагъанлагъа премияла бериуню юсюнден указгъа къол салгъанды.

Къабарты-Малкъар Республиканы Башчысыны премиясын Битеуроссей олимпиада да юч алчы жерге тийишли болгъан школчула  алгъандыла. Андан сора да, школчуланы Битеуроссей олимпиадаларында республикалы урумунда хорлагъан 48 окъуучу, ана тилден республикалы олимпиада да хорлагъан жети школчу эм билим берген учреждениялада ишлеп сабийлени олимпиадалагъа хазырлагъан 56 устаз саугъала алгъандыла.

Бизни корр.