Ал жанында жашау журтланы къурулушу, инфраструктураны къурау

  КъМР-ни Башчысы  Казбек Коков Регионланы айнытыу жаны бла правительстволу комиссияны Россейни Правительствосуну Председателини орунбасары Марат Хуснуллинни башчылыгъы бла видеоконференция халда бардырылгъан жыйылыууна къатышханды.Анда сёз асламысында «Жашау журтла эмда шахарда болум» миллет проект къалай толтурулгъаныны эмда инфраструктураны къурау бла байламлы халны юсюнден баргъанды. Аны юсюнден КъМР-ни Башчысыны бла Правительствосуну пресс-службьасы билдиргенди.

  Къабарты-Малкъарда 2021 жылда жашау журтладан 514 минг квадрат метрден аслам ишленнгенди, ол а 2020 жыл бла тенглешдиргенде 102,8 процентни тутады.

 Казбек Коков инфраструктура проектлени магъаналылыкъларын, ала жашау журтланы къурулушларын бардырыугъа кёллендиргенлерин да чертгенди. 2022-2024 жыллада  Нальчикде  аллай      проектлени бир ненчасын тамамлар умут барды. Алагъа федерал эмда регион бюджетледен миллиард сомдан артыкъ бёлюрге белгиленеди. Алайды да, Искож микрорайонда автомобиль жолланы тюплеринде тартылгъан инженер ызлагъа тынгылы ремонт этилликди. Ол а халкъны суу бла чырмаусуз жалчытыргъа онг берликди.

 Суу ызла Нальчикде «Восточный», Акъ-Сууда «Эркин Езен» гитче районлада,  «Мишхидж» коттеджли посёлокда, Хасанияны жангы юйле ишленирик тийресинде, «Дубки07» эмда «Сосруко» дача районлада тартыллыкъдыла.

 «Таза суу» миллет  проектге тийишлиликде  Кишпек, Кёнделен, Карагач, Красносельское, Пролетарское, Урван, Лашкута, Баксанёнок, Лячинкъая, Хушто-Сырт, Белокаменское, Огъары Куркужин, Герпегеж элледе бла  Александровская станицада суу бла жалчытыучу 17 объект ишленнгенди эмда жангыртылгъанды.

 Быйыл а  Бахсан районда бирикген суу ыз ишленирикди. Аны узунлугъу 77 километрди, проект багъасы уа 2 миллиард сомдан артыкъды. Анга федерал бюджетден регионнга былтыр октябрьде окъуна кредит берилгенди. Проект тамамланса, Бахсан шахар округда, Заюково, Атажукино, Исламей, Баксанёнок, Псычох элледе жашагъан 98 минг чакълы бир адамны таза суу бла жалчытыргъа къолдан келликди. Аны бла да къалмай, жашау журтланы къурулушларын бардырыргъа да онг чыгъарыкъды. Бу ишни быйыл жаз башында башларгъа эмда 2023 жылда бошаргъа белгиленеди.