Жашауну сакъларгъа боллукъ эсгертиуле

Кёп болмай «Россети Себерный Кавказ» Каббалкэнерго» компанияны келечилери Нальчикде  «Радуга» санаторийде солугъан   школчулагъа  электрокюч бла байламлы  къоркъуусузлукъну юсюнден  билдирирча ачыкъ дерс бардыргъандыла.   

Мында    саулукъларына бакъдырырча жылны узуну республиканы районларындан сабийле   келгенлей турадыла.    Энергетикле  алагъа кезиу-кезиу   тюбеп  токну хайырлыгъыны,  хаталыгъыны  юсюнден  ангылатырча магъаналы  иш бардырадыла.

 Бу жол да  специалистле сабийлеге энергообъектлени къатында  кеслерин къалай  жюрютюрге кереклисин, юйде ток  бла ишлеген  аберилеге да уллу кёллю болмазгъа тийишлисин эсгертгендиле. Ол санда ⠀ трансформатор подстанциялагъа жууукълашыргъа,  кирирге, конструкцияланы юслерине минерге,  ток баргъан чыбыкълагъа тиерге, аланы тюбюнде ойнаргъа, суу объектледе  уа  жюзерге эм  чабакъ тутаргъа   жарамагъанын ангылытахандыла. 

Сабийле ачыкъ дерсге, тири къатышхандыла эм кёп соруу да бергендиле. Бютюнда бег а  «Александр» деген робот-тренажёр  бла мастер-классны жаратхандыла.  Аны бла  бирге къыйын болумгъа тюшген  адамгъа биринчи болушлукъ этерге юйренип сынамларын кючлегендиле.
Эсге ала айтсакъ, быйылгъы  жыл башланнганлы токчула  республиканы   санаторийлеринде   эм  билим бериу учрежденияларында отуздан аслам ачыкъ дерс бардыргъандыла. Аны чеклеринде  жорукъланы билдиргенлеринден сора да,   энчи оборудование бла техниканы хайырланыргъа эм  манекенледе биринчи болушлукъ тапдырыргъа  юйренедиле.