Бир пособие – 150 минг сабийге

 Россейни Социал фондуну (СФ) республикада бёлюмю 2023 жылда 17 жыллары толмагъан 150 мингден аслам сабийни ата-анасына эмда баладан ауурлулукълары болгъан 7,7 минг тиширыугъа бир пособияны тёлегенди.

Юйюрлеге себепликни бу тюрлюсю бла хайырланыр ючюн инсан Россейни гражданини болургъа эм дайым да бу къыралда жашаргъа керекди. Аны ёлчеми юйюрню файдасына кёре тергеледи, адамгъа жашау этерге керекли ахчаны эм аз ёлчемини 50, 75, 100 проценти тенгли болургъа боллукъду.

 2024 жылда Къабарты-Малкъарда адамгъа жашау этерге керекли ахчаны эм аз ёлчеми кёбейтилгенди, анга кёре уа бир пособиягъа да къошулгъанды. Аны ёлчеми энди быллайды:

- 17 жыллары толмагъан сабийлери болгъан юйюрлеге: эм азы - 8 720,40 сом, эм кёбю - 17 440,20 сом;

 - баладан ауурлулукълары болгъан тиширыулагъа: эм азы - 9 013,18 сом, эм кёбю - 18 026 сом.

Юйюрге социал болушлукъну бу тюрлюсюню керек болгъаны бла къалгъаны аны алыуну юсюнден заявление берилген кюнде тохташдырылады. Фондну регион бёлюмю аны социал казначейство халда береди. Башхача айтханда, аны алыргъа заявленияны ата-анала къырал жумушланы порталында жазадыла, къалгъан шартла СФ-ха ведомствола аралы байламлыкъла жюрютюуню чегинде жибериледиле. 

Бир пособие 17 жыллары толмагъан сабийлени ёсдюрген юйюрлеге эмда баладан ауурлулукълары болгъан тиширыулагъа къырал болушлукъну амалларындан бирича 2023 жылда кийирилгенди. Ол талай башха тёлеуню алышындыргъанды, аны алыргъа файдалары адамгъа жашау этерге керекли ахчаны эм аз ёлчемине жетмеген юйюрле эркиндиле. Жангылыч болмазча уа, пособияны тохташдыргъанда, фонд юйюрню файда жаны бла керти болумуна къарайды.