Жууаланы хайырлылыкълары адамгъа хайыры эмда хатасы

Шампиньон деп жууаланы бир тюрлюсюне айтадыла. Аны кёп ашлагъа къошадыла, алайлай, биширип неда къуууруп да хайырланадыла. Арт кезиуледе бу затланы бизде ашханалада да шишликча къуууруп бередиле. Аланы да кёпле сюйюп аладыла. Бу жууаны хайырыны эмда хатасыны юсюнден врач-эндокринолог, медицина илмуланы кандидаты Елена Сюракшина айтханды:

- Шампиньон В, С, D, PP витаминледен, кальций, фосфор, селен, хром, молибден, марганец, йод, цинк, кремний деген затладан байды. Ол нервалагъа, иммунитетге, сюеклеге хайырлыды. Жууада белок да бек кёпдю. Жаулары бла углеводлары уа азды, аны себепли ол диабетден къыйналгъанлагъа да жарайды.

Ол холестеринни мардасына келтиреди, аны осал тюрлюсюн азайтады. Кальций сюеклени къаты этеди, остеопороз бла аурумазгъа болушады. Калий а къанны басымы кётюрюлмезча этеди, тамырлагъа да игиди.

Алай шампиньонну хар неси да хайырлы тюйюлдю. Жууада бек кёп хитин барды, ол а аш орунда къыйын эриген затды. Аны кёп ашаса, адам къыйналлыкъды. Дагъыда бирледе ол аллергия къозгъаргъа боллукъду. Алай болмазча шампиньонланы иги къууурургъа неда биширирге керекди.

Къайсыларын жарайды ашаргъа?

Шампиньонну къайсысы да къоркъуулу тюйюлдю. Аз-маз къара болгъанлыкъгъа, ол аны бузулгъанын кёргюзтмейди. Кесип кёрюгюз да, ичи акъсылдым эсе, ашай бересиз.

Адамны саулугъу иги эсе, шампиньонну чийлей ашаргъа да жарайды. Алай биринчиден а ол тап жерде ёсгенин билигиз. Ызы бла иги жуууп, лимон суу неда уксус къошугъуз. Къалай этсегиз да, билигиз: чий жууа аш оруннга къыйынды.