Жангылыкъла

Нальчикде «Акрополь» солуу-той-оюн  арада  саулукъларында кемчиликлери болгъан сабийлеге  «Биз биргебиз» деген проектни чеклеринде слёт болгъанды. Анга жюзден артыкъ сабий, аланы ата-аналары, волонтёрла, тренерле эмда психолог къатышхандыла.

Россейде  пропискалары болмагъанлай жашагъанлагъа Пенсия фонддан тёлеулери тургъан адреслери бла бериледи. Аны юсюнден тюрлениуле мартда кийирилгендиле. Инсан социал пенсия алыр ючюн, Россейде жашагъаныны юсюнден фондха заявление жазып неда социал жумушла бла жалчытыу, тутмакъ эм билим бериу учрежденияладан алгъан документлери бла билдирирге боллукъду.

Къабарты-Малкъар Республиканы Ветеринария управлениясыны келечилери быйыл озгъан эки айны ичинде комплекс халда 23 ветеринар-санитар тинтиу бардыргъандыла. Бу иш малчылыкъ продукцияны жарашдырыу бла кюрешген производстволада эмда аны сатыу-алыу жерледе ётгенди, деп билдиргендиле ведомстводан.

КъМР-ни Кёп жумушланы тамамлагъан арасыны (МФЦ) Лескен районда бёлюмю «Россейни  кёп жумушланы тамамлагъан эм иги арасы» деген конкурсда  «Эм  ахшы  МФЦ» номинацияда хорлагъанды, деп билдиргендиле учрежденияны пресс-службасындан. Сагъынылгъан номинациягъа саулай къыралдан 50 чакълы Ара къатышханын белгилерчады.

Озгъан шабат кюнде  Элбрус районну администрациясыны  Жаш тёлю политика жаны бла бёлюмю къурап   субботник бардырылгъанды. Анга 5-чи номерли гимназияны окъуучулары, колледжни студентлери - саулай да жыйырмадан артыкъ волонтёр къатышхандыла.

Озгъан шабат кюн Хасанияны школчулары устазлары бла бирге   битеуроссей субботникге чыкъгъандыла. Ала, къолларына  сибиртгиле, кюрекле, челекле да алып,  мектеплерини арбазын сыйпагъандыла, тереклени керексиз бутакъларын кесгендиле, жол жанларында бордюрланы акълагъандыла, гюлле ёсген жерлени хансдан тазалагъандыла.

Къабарты-Малкъар къырал университетни  Х.С.Темирканов атлы маданият арасында  «Халкъларыбызны шуёхлукъларыны тамырлары – тарыхыбызны теренинде» деген миллетле аралы  проектни  презентациясы болгъанды.

Россейни Пенсия фондунда Жамауат советни жыйылыуунда Социальный жалчытыуну бирикдирилген къырал информация системасын (ЕГИССО) айнытыуну амаллары сюзюлгендиле. 
 

Тюркню  Onur air  авиакомпаниясы  Нальчикден тюзюнлей Стамбулгъа рейс ачханды. Биринчи самолёт 21 апрельде Стамбулдан бери учарыкъды, ызына уа 22 апрельде къайтырыкъды. 180 адам сыйыннган  Airbus A320 ыйыкъгъа эки кере учарыкъды. Сурам болса,  шабат кюнде да бир рейс боллукъду.

Быйыл мартны  ал кюнлеринден башлап  губула къабып  республиканы медицина учрежденияларына 21 адам келгенди, деп билдиргендиле Роспотребнадзорну КъМР-де бёлюмюнден.
Бизни республика кърым геморрагия безгек (КГЛ) жайылыргъа къоркъуулу жерге саналады. Ол саулукъгъа уллу заран салгъан, бирде ёлюмге да келтирген аман аурууду. Кёбюсюнде ол  губу къапхандан сора жугъады,  алай къуртну къол бла эзгенде да хата жетерге боллукъду. 
Озгъан жылны эсеплей айтханда, профилактика ишлени хайырындан республикада губуланы эм тири кезиулеринде ол ауруу тюбемегенди.