Сабийлени бла волонтёрланы аралары жууугъуракъ болурча

Нальчикде «Акрополь» солуу-той-оюн  арада  саулукъларында кемчиликлери болгъан сабийлеге  «Биз биргебиз» деген проектни чеклеринде слёт болгъанды. Анга жюзден артыкъ сабий, аланы ата-аналары, волонтёрла, тренерле эмда психолог къатышхандыла.  Аны  «Нальчик шахар округда 2016-2020 жыллада тийишли болум къурау» деген муниципал программаны чеклеринде ол жерли  администрацияны физкультура, спорт эмда жаш тёлюню ишлери жаны бла управлениясы эмда Нальчикде жаш тёлюню ассоциациясы къурагъандыла, деп билдиргендиле мэрияны пресс-службасындан.

Слётну баш мураты - саулукъларында кемчиликлери болгъан сабийлени бла жаш тёлюню эм волонтёрланы араларында байламлыкъла къурауду. Анга къатышханла,  ойнап, кюлюп, суратла ишлеп,  заманларын зауукълу ётдюргендиле. Аланы ата-аналары уа татлы ашарыкъла бла сыйланып, психологдан консультация болушлукъ алгъандыла.

«Биз биргебиз» проектни чеклеринде мындан арысында энтта да талай жумушла тамамланырыкъдыла. Ол санда: сейир  адамла бла тюбешиуле боллукъдула, ачыкъ жерледе кинофильмле кёргюзтюллюкдюле, тюрлю-тюрлю жыйылыула къураллыкъдыла.

Улбашланы Мурат.
Поделиться: