Жангылыкъла

Быйыл Къабарты-Малкъарда биринчи кварталны эсеплерине кёре, промышленный  производствону индекси (ИПП) 110,4 процентге жетгенди. Эм уллу ёсюм 22  жарашдырыучу бёлюмде болдурулгъанды, аладан 17 КъМР-ни Промышленность эм сатыу-алыу министерствосуна бойсуннганладыла.   Быйыл биринчи кварталда жарашдырыучу  производствода ёсюм 8,5 процентге жетгенди.  Ол бирси жылладан иги да уллуду. Бу бёлюмде компьютерледен, электрон эм оптика бла байламлы абериледен 4,5 кереге кёп чыгъарылгъанды. 

Черек районну администрациясыны  башламчылыгъы бла бу ауузну битеу эллеринде да  терроризмге, экстремизмге къажау кюрешге, саулукълу жашау халны бардырыугъа, культураны айнытыугъа, мамырлыкъны бла келишиулюкню кючлендириуге  жораланнган жыйылыула жылгъа эки кере   бардырыладыла.   Аллай кезиулю тюбешиу бу кюнледе  Къашхатауда да ётгенди.  Анга район администрацияны башчысыны орунбасары Улбашланы Сахадин, прокурор Тимур Хавпачев, Къашхатауну таматасы Уяналаны Азрет, иймам Мецелланы Алик,  школчула да къатышхандыла.

Хурметли жамауат!
Бир тюрлю сылтаула бла сиз «Заманны» быйылны  тёрт айында алалмай  тура эсегиз, халны тюзетирге онг барды. 28-чи апрельге дери,  почтагъа барып, жазылыуну жарашдырсагъыз, ана тилибизде чыкъгъан газетни 1-чи майдан окъуп башларыкъсыз.

Жазылыуну эки айгъа багъасы – 204 сом 26 капек.

Бизни индексибиз – 51 532

Кёп болмай Тебердада белгили жарыкъландырыучу Кърымшамхалланы Исламны  юйюнде аны аты бла бардырылгъан 11-чи окъуула ётгендиле. Тёрели  жыйылыугъа миллетни дунияны кёп къыралларында жашагъан илму интеллигенциясыны келечилери чакъырыладыла.

Кёп болмай Нальчикде Россейни  акушер-гинекология  обществосуну школуну (РОАГ)   перинатал медицина эм неонатология темагъа жораланнган жыйырма бешинчи   регион аралы  конференциясы болгъанды. Анга Шимал Кавказдан беш жюзден аслам специалист къатышхандыла, ол санда КъМР-ни саулукъ-сакълау министри Марат Хубиев да.

Жууукъ заманда  Ленин атлы проспектде  автобусла тохтагъан жерле жангыртыллыкъдыла. Аланы тюрсюнлерин  нальчикчиле кеслери сайлагъандыла, деп билдиргендиле шахар округну администрациясыны пресс-службасындан.

Черек районну Къашхатау элинде жууукъ заманлада  саулукъну кючлендириу эмда башха жумушланы да толтуруу жаны бла комплексни къурулушу башланырыкъды.  Анда  спортну кёп тюрлюлери бла кюреширге онг берген кенг эмда хар кереклери болгъан отоуладан сора да,  бассейн  да боллукъду.

Россей Федерацияны регионларында илму-производстволу кооперацияны системасын къурау жаны бла проектни къыйматлы тамамлар умутда Кърым республикада эл мюлкню илму-излем институтунда регионла аралы кенгеш бардырылгъанды кёп болмай. Аны РФ-ни Илму эм бийик билим бериу министерствосу бла Илмуланы россей академиясы къурагъандыла. Бизни республикадан анга Къабарты-Малкъар къырал аграр университетни келечилери къатышхандыла: профессор Ирина Ханиева, агрономия факультетни студенти Ахмед Саболиров бла аспиранты Астемир Алоев, деп билдиргендиле вуздан.

Предпринимательство бла кюрешгенде адам къаллай тыйгъычлагъа тюберге боллугъуну эмда бу ишни энчиликлерини юсюнден Май районда бардырылгъан  «тёгерек столда» айтылгъанды. Анга КъМР-ни Энергетика, тарифле эмда жашау журтлагъа надзор этиу министерствосуну, Сатыу-алыу палатаны, «Бюро-Контур» компанияны, жер-жерли администрацияланы, предприятияланы, организацияланы, жамауат биригиулени келечилери эмда бизнесменле къатышхандыла. Жыйылыуну бардырыугъа Къабарты-Малкъарда предпринимательлени эркинликлерин къоруулау жаны бла Уполномоченныйни аппаратыны специалистлери себеплик этгендиле.

Къабарты-Малкъарда Басхан эмда Лескен районлада электросетьледе бирикген информация-эсеплеу комплексни (ЕИВК) сингдириу барады, деп билдиргендиле «МРСК СК» компанияны республикада бёлюмюнден.