Жангылыкъла

2020 жылда Россейни энтта кезиулю пенсия реформа сакълайды. Ол энчи пенсия капиталны (ИПК) къурау бла байламлы боллукъду. Бу жангы амалны жашауда бардырыр ючюн ишлеген адамланы хар 1000 сомларындан 60 сом налог тыйыллыкъды деп белгиленеди. Бу проектни сюзюу озгъан ыйыкъда РФ-ни Правительствосунда болгъанды.

Къабарты-Малкъарны Эл мюлк министерствосундан битимчиликде уруннганлагъа субсидия  бериллигини юсюнден билдиргендиле. Болушлукъ алыргъа сюйгенле документлени, министерствогъа 5  апрельге дери элтип берирге керекдиле.

Элбрус районну администрациясыны башчысы Залийханланы Къаншаубий Терроризмге къажау муниципал комиссияны жыйылыуун бардыргъанды. Анга  Россейни ОМВД-сыны, КъМР-де УФСБ-ни Тырныауузда бёлюмюню, район прокуратураны, жол управленияны, МЧС-ни КъМР-де Баш управлениясыны бёлюмюню, район аскер комиссариатны, тюрлю-тюрлю организацияланы бла управленияланы таматалары,  шахарны бла эллени башчылары къатышхандыла.

Кёп болмай Къырал эм муниципал жумушланы тамамлагъан кёп функциялы араны (МФЦ) келечилери жыл сайын бардырылгъан «Жерни халкъла аралы кюню» деген акциягъа къатышхандыла.
Ол кюн учрежденияны Нальчикде 2-чи номерли бёлюмюню тийресинде аллеяда «Горзеленхозну» келечилери да  болушуп жыйырма жёге терекчик орнатылгъанды. Бу магъаналы ишге къол къыйын салгъанланы арасында КъМР-ни экономиканы айнытыу министри Рахайланы Борис, министерствону электрон жумушла эм системалы управленияны  департаментини таматасы Чочайланы Мариям, МФЦ-ны таматасы Аслан Афаунов да болгъандыла. 

Россейни Сюд приставларыны  федерал  службасыны Къабарты-Малкъарда  Управлениясыны  энчи интернет-сайтында "Банк данных исполнительных производств" информация система бёлюмю барды. Аны болушлугъу бла гражданланы, юридический лицоланы да борчларыны юсюнден билирге боллукъду. Жаланда  адам тукъумун, атын, предприятияны  атын неда  толтуруучу производствону номерин жазгъанлай, экранда борчуну юсюнден толу хапар билликди.

Хар жыл сайын Россейде, башха къыралладача, Хайырланыучуну эркинликлерин къоруулауну битеудуния кюню белгиленеди. Хайырланыучуланы организацияларыны халкъла аралы федерациясы анга бир тюрлю чакъырыу къураучуду. Быйыл ол быллайды: «Trusted Smart Products – Цифралы дуния: ышаннгылы смарт-устройствола».

Арт заманда Къабарты-Малкъарда жашагъанлагъа  Роспотребнадзорну атындан ахча излеп сёлешгенле болгъанларыны юсюнден хапарла жюрюйдюле.

Россельхознадзорну Къабарты-Малкъарда эмда Шимал Осетияда бёлюмюнде ведомствону бла КъМР-де Ветеринария управленияны арасында байламлыкъла къурауну юсюнден кенгеш болгъанды. Сёз мында пробала алыуну эмда лаборатория тинтиуле бардырыуну юсюнден барады, деп билдиргендиле ведомствону пресс-службасындан. Жыйылыугъа бёлюмню башчысы Рустам Абдулхаликов, Россельхознадзорну Референт арасыны таматасы Хаути Сохроков, Ветеринария управленияны башчысы Аслан Арамисов эм башхала къатышхандыла.

Алгъаракъда Нальчикде Россейде предпринимательствону тарыхыны юсюнден Битеуроссей олимпиаданы регион кезиую ётгенди. Аны «Иш кёллю Россей» деген жамауат организацияны жер-жерли бёлюмю къурагъанды, деп айтылады аны сайтында.

Кёп болмай Къабарты-Малкъар къырал университетни прогрессив эм аддитив технологияла арасыны  алимлери   Бангкок шахарда  халкъла аралы IPITEX кёрмючде «Бийик технологиялы полимерле эм композитле» деген ишлери ючюн  кюмюш майдал бла саугъаланнгандыла. 
Кёрмючде жыйырма беш къыралдан илму эм техника жаны бла мингнге жууукъ жангычылыкъ бла проект  кёргюзтюлгенди, ол санда онусу - Россейден. Аланы  арасында  КъМКъУ-ну прогрессив  полимерле лабораториясыны ишлери да бар эдиле. Специалистле эмда  жюри алагъа бийик багъа бергендиле.