Айырмалыны жамауат сайларыкъды

 «Халкъ участковый-2022» конкурсну биринчи кезиую башланнганды. Ол   полицияны къуллукъчуларына ышаныулукъну эмда бу усталыкъны даражасын ёсдюрюр, жамауатда право низамны сакълаучулагъа  кёз къарамны игилендирир  мурат бла къуралады.

Эришиуле юч бёлюмден къураладыла, алада  айырмалыланы халкъ сайларыкъды. Къол кётюрюу Интернетде бардырылады, анга хар инсан да къатышыргъа, аны оюмуна кёре полицияны участка уполномоченныйини атына тийишли болгъанны сайларгъа  эркинди.

«Халкъ участковый» ат ючюн эришгенлени суратлары, аланы юслеринден шартла КъМР-де МВД-ны сайтында басмаланыпдыла. Къол кётюрюуню биринчи бёлюмю 11-20 сентябрьде бардырылады. Анда хорлагъанланы атлары 7 октябрьге дери белгили этилликди. Конкурсну экинчи бёлюмю уа 7-16 октябрьде ётерикди.

Анда хорлагъан а Къабарты-Малкъарны полициячыларыны атларын федерал даражада къорууларыкъды. Къол кётюрюу конкурсну партнёру «Комсомольская правда» басма юйню сайтында бардырыллыкъды.