Жалгъан банкирге ийнанып, 180 минг сомун тас этгенди

Быйыл 1 сентябрьде 51-жыллыкъ прохладначы тиширыугъа ол танымагъан биреулен сёлешгенди. Ол банкны келечисиме деп, алдап, хыйлачыла аны аты бла миллион сомгъа кредит алыргъа умут этгенлерин, ала заявка бергенлерин айтханды. 

Аланы тохтатыр ючюн а, аманлыкъчыладан алгъа болуп, кредит алыргъа, ызы бла аны «къоркъуусуз счётха» ашырыргъа керекди дегенди.  Алай бла тиширыу 184 минг сомгъа кредит карта алгъанды, ахчаны анга белгили этген счётха ашыргъанды.

Анга жалгъан банкир сёлешгенин, ол аманлыкъчыланы къолуна тюшгенин ангылагъандан сора прохладначы полициягъа тарыкъгъанды.

Хурметли жамауат! Право низамны сакълаучула сакъ болуругъузну тилейдиле. Банкны келечилери телефоннга сёлешмегенлерин, бир тюрлю банк операция бардырмагъанларын, ахчаны «къоркъуусуз счётха» ашырмагъанларын энтта бир кере эсгертедиле. Сизден танымагъан адам банкны келечиси болгъанын айтып, быллай жумушла толтуругъузну тилесе, ушакъны тохтатып къояргъа керекди.