Бир эришиуден эки майдал бла

    Ыйых кюн «Нальчик» спорт комплексде, Къабарты-Малкъар Республиканы 100-жыллыгъына жораланып, сумодан КъМР-ни 3 чемпионаты бла биринчилиги ётгендиле. 

  Бизни республикагъа спортну бу тюрлюсю жангыды. Алай аны бла кюреширге сюйгенлени саны кюн сайын ёсе барады. Озгъан солуу кюнледе ётген эришиуле анга шагъатдыла. Алагъа республиканы районларындан бла шахарларындан 200-ден аслам спортчу къатышхандыла.

Бу эришиулеге Чегем шахарны 3 номерли школуну окъуучусу Эттеланы Азамат да къатышханды. Ол 75 килограмм ауурлукъда 17 жыллары толмагъанланы араларында сермеше, биринчи болгъанды. Дагъыда аны 19 жыллары толмагъанланы араларында да сынагъандыла. Анда да ол къарыуун кёргюзтюп, «доммакъ» къытханды.

 Суммогъа дери таулу жаш эркин тутушуу бла кюрешип тургъанды. Спортну бу тюрлюсюне уа былтыр кёчгенди. Тренер Рустам Бегидовда жарау этеди.