Жаш тёлюню айныууна себеплик этген кюч

Жамауат палатаны билим бериу, илму, жаш тёлюню ишлерин айнытыу жаны бла комиссиясыны жыйылыуунда республиканы жаш тёлюсюн ёсдюрюуде волонтёрствону жерини юсюнден соруугъа къарагъандыла. 

Жыйылыуну ача, комиссияны башчысы Байчеккуланы Нина бюгюнлюкде Россей къыйын тарых болумгъа тюшгенин, жаш адамланы ангылауларында мюлк байлыкъ тин байлыкъдан эсе магъаналы болгъанын белигелегенди. Огъурлулукъ, башхагъа игилик этерге итиниулюк, тюзлюк, туугъан жерге сюймеклик – ала барысы да бир жанына кетгенчадыла. Хар айныгъан миллет, жамауат ёсе келген тёлюлерин ариу халда юйретирге тийишлиди. Ол мурат бла къыралны Президентини «Россейли тёрели тин-ниет байлыкъланы сакълау эм кючлеу мурдорланы къауумун бегитиуню юсюнден» 809-чу номерли буйругъу къабыл кёрюлгенди.

Сабийлени бу халда юйретиу алагъа артда жамауатыбызны айнытыргъа, игилендирирге болушурукъду. Аны ючюн а аланы бюгюннгю жашауну  энчиликлерине тюшюндюрюрге тийишлиди, былайда волонтёрство уллу себеплик эталлыкъды, деп къошханды республиканы жаш тёлюню ишлери жаны бла министрини орунбасары Татьяна Асыкина. Ведомство бусагъатда «Социал тирилик» деген проектни бардырады, анда добровольчествогъа болушлукъ этиуде регион сынамланы конкурсу ётдюрюледи. Былтыр «Сабийни мектепге жыйышдыр» жандауурлукъ марафонда къолайлары аз юйюрледен сабийлеге окъуу керекле алыннгандыла, аланы талайы Херсон областьха жиберилгендиле. Жылны ахырында уа, Доброволецни кюнюне атап, республиканы волонтёр къымылдауларыны форуму болгъанды, эм тирилеге саугъала берилгендиле. Огъурлу ишлеге жангызда жаш адамла угъай, «Молоды душой» программагъа кёре абаданла да къошуладыла. Ковидни пандемиясыны кезиуюнде къартайгъан адамлагъа, эшикге чыгъаргъа онглары болмагъанлагъа 50 мингнге жууукъ аш-азыкъ хуржун юлешиннгенди. 2022 жылда уа энчи аскер операциягъа къатышханланы юйюрлерине турмуш, гуманитар, психология эм юридический себеплик этген штаб ачылгъанды.

Добровольчество къымылдау бла къырал власть органланы араларында байламлыкъланы юслеринден «КъМР-де добровольчествону (волонтёрствону) айнытыуну ресурс арасыны» директору Милана Хашева билдиргенди. Ол айтханыча, бу жаны бла хал арт жыллада игиленнгенди, регионну Башчысында волонтёрство жаны бла совет къуралгъанды. 2023 жылны майында болгъан эсеплеге кёре, волонтёр ишге къатышханланы саны 15 мингден атлагъанды. 2018-2019 жыллада регионну битеу шахарларында бла районларында, муниципалитетледе да волонтёрствону айнытырча, элчи жаш тёлюню да бу ишге къошар мурат бла ресурс араны бёлюмлери ачылгъандыла.

«Билим бериу» проектни чегинде республика волонтёрствогъа болушлукъ этиуде битеуроссей конкурсда эм иги 26 субъектни санына киргенди эм 8196,3 минг субсидия алгъанды. Тёрт волонтёр-КъМР-ни Башчысыны, дагъыда тёртеулен-Правительствону, отуз алтысы Жарыкъландырыу, илму эмда жаш тёлюню ишлери жаны бла министерствону ыразылыкъ къагъытлары бла саугъаланнгандыла. Жаш тёлю жамауат магъаналы иш бла кюреширча #БизБиргебиз битеуроссей акцияны, «Конституцияны волонтёрлары» проектни муниципал штаблары къуралгъандыла. Быллай ишлеге къатышыу жаш адамлагъа ЮФО-ну бла СКФО-ну доброволецлерини округ форумларында (Майкоп), СКФО-ну доброволецлерини округ форумларында (Шимал Осетия-Алания), #Биз Биргебиз халкъла аралы форумгъа, «Муратланы назы тереги» битеуроссей акциягъа, Жаш бёлюмюню Шимал - Кавказ фестивалына, «Твой Ход!», «Тамблагъы кюнюбюзню ишлейбиз», «Машук», «Уровень 2.0. – Next» эм башха жаш тёлю форумлагъа барыргъа онг береди. КъМР-ни жарыкъландырыу эм илму министрини орунбасары Екатерина Мисостова ведомствода добровольчествону айнытыу бёлюм болгъанын, билим бериу организациялада 217 волонтёр отряд къуралгъанын, алагъа 9 718 окъуучу киргенин да билдиргенди.

Сабийлени эм жаш тёлюню «Биринчилени къымылдауу» битеуроссей къымылдауну регион советини биринчи жыйылыуунда 184 мектепде первичный бёлюмлени ачаргъа оноу этилгенди, бюгюнлюкде ала 131 школда бардыла. Волонтёр организацияланы келечилери тюрлю-тюрлю акцияланы ётдюрюрге да болушадыла, ол санда Халкъ бирликни кюнюн, Къырал байракъны кюнюн, Хорламны, Россейни, Къабарты-Малкъарны кюнлерин белгилерге, Жаш тёлюню кюнюн, аскер –патриот ишлени тамамлаугъа да къошумчулукъ этгендиле. Ёсе келген тёлюлени Ата журтха сюймекликде юйретир ючюн жыл сайын 7-9 майда «Эсгериуню вахтасы» къуралады, анда жаш армеецле Уллу Ата журт урушда ёлгенлени эсгере, сыйлы къарауулда турадыла. Тёрели халда «Эсгериуню вахтасы» патриот акция къуралады, волотёрла жаш армеецле бла бирге республиканы баш майданларында Георгиев журунну жаядыла.

Жыйылыуну ахырында, этилген докладла эсге алынып, сейирлери болгъан органлагъа эсгертиуле этилгендиле.