Жюзюмчюлюкню айнытыргъа – танг кесек болушлукъ

Белгилисича, жюзюмчюлюк агропромышленный  комплексни къыйматлы бёлюмюне саналады. Ол себепден аны айнытыугъа  къыралдан  танг кесек болушлукъ тапдырылады.  

КъМР-ни Эл мюлк министерствосундан билдиргенлерича, бюгюнлюкде республикада жюзюмчюлюкге бёлюннген жерлени уллулугъу бир минг гектардан аслам болады. Аны бла бирге  былтыр 26 гектарда жангы технологиялагъа кёре, терк айныгъан терек бахчалыкъла орнатылгъандыла. Аллай амал бла бир гектарда эм  азындан  юч минг терек салыргъа онг барды.  Жангы мюлкню къураргъа 19,6 миллион сом къоратылгъанды. Андан 18,6 миллион федерал бюджетге жетеди, къалгъанын да республика кесинден къошханды. 

Жюзюмчюлюк бёлюмню айнытыуну баш магъанасы республикада эски плантанцияланы жангыртыргъа,  аланы орунуна  терк айныгъан бахчала салыргъа эм кёбейтиргеди. Къабарты-Малкъарда жюзюмчюлюк бла асламысында Терк, Прохладна, Май, Урвань районлада орта эм гитче предпринимательле  кюрешедиле. 

Статистиканы эсеплерине кёре, былтыр жыл башланнганлы республикада жюзюмню  эл мюлк организациялада – 522,  элчи фермер мюлкледе -  500 эм энчи иелик  бахчалада 40 гектарда   ёсдюредиле. Аладан 99 проценти тирлик бередиле.  Саулай алап айтханда, былтыр жюзюмден  20 минг тоннагъа жууукъ   жыйылгъанды.
Мюлклени кёбюсюнде тыш къыралдан келтирилген бай тирлик берген  эм чагъыр этилген  сортла  ёсдюрюледиле. Аны жартысын республикада жарашдырадыла, къалгъаны да тышына сатылады.

КъМР-ни эл мюлк министерствосунда билдиргенлерича,быйыл энтта да   хауа болум аламат келишген  Терк бла  Прохладна районлада  жюзюм плантацияла орнатыллыкъдыла.  Бусагъатда тюрлю-тюрлю мюлкле къыйматлы программагъа  къатышырча  бизнес-проектлерин хазырлап кюрешедиле.