Москвачыланы военкоматлагъа чакъырадыла

Москвада жашагъанлагъа «къагъытларын  тохташдырыргъа» деген сылтау  бла военкоматлагъа чакъырып, повесткала бередиле. Аллай жалгъан хапарланы социал сетьледе эм телеграм-каналлада жайгъандыла, деп билдиреди войнасфейками.рф телеграм-канал.

Сагъынылгъан повестка жалгъан къагъытды. Бек алгъа ол закон бла келишген эм тохташдырылгъан марда бла этилмегенди.

 «Законнга тийишлиликге кёре» дегенни орунуна «Федеральный законнга тийишлиликде» деген сёзле жазылыргъа боллукъдула. «Сиз борчлусуз» дегенни орунуна «Сизге былай айтылады» деп жазылыргъа керекди.

 Андан сора да сагъынылгъан чюйреликлени юсюне ол документни сериясы терс жазылыпды. Ол хар заманда Россей Федерацияны субъектине кёре къуралады.

 Андан сора къуллугъу да терс жазылгъанды. «Москваны Данилов районуну аскер комиссары» дегенни орунуна «аскер комиссариатны аскер комиссары» деп жазылады.

 Москвадан сора да жалгъан повесткала Россейни башха шахарларында да жайгъанлай турадыла. Войнасфейками.рф телеграм-канал жазгъанына кёре, ала  мындан алгъа къыралда «жашырын мобилизация»  бардырылады деген ётюрюк хапар болгъаныны юсюнден билдирген эдиле.