Жангылыкъла

Къыралда агропромышленность комплексни ишин тынгылы бардырыугъа кёз-къулакъ болгъан оператив штабны кезиулю жыйылыуу ётгенди бу кюнледе. Аны РФ-ни эл мюлк министри Дмитрий Патрушев видеоконференция халда бардыргъанды. Кенгешде жаз башы сабан ишлени, от тюшюу жаны бла къоркъуусузлукъну жалчытыуну, «Мирзеу» федерал информациялы системаны юслеринден сёлешгендиле. Анга регионланы АПК управленияларыны келечилери къатышхандыла, ол санда Къабарты-Малкъарны эл мюлк министри Хасан Сижажев да.

Юйюрню орта эсеп бла файдасы регионда инсаннга жашау этерге керекли ахчаны эм аз ёлчемини эки къатысына жетмей эсе, ол, заявление жазып, аналыкъ капиталдан ай сайын тёлеуле алыргъа боллукъду. 2023 жылда Къабарты-Малкъарда адамгъа жашау этерге керекли ахчаны эм аз ёлчеми 15 381 сомду.

«Россети Шимал Кавказ» компания былтыр Къабарты-Малкъарда электрокюч сетьлеге 36 жашау журт комплексни къошханды. Аланы барына да 9,1 МВт бёлюннгенди. 

 Аналыкъ капиталны программасы ишлеп башлагъанлы Къабарты-Малкъарда аны болушлугъу бла 63 772 юйюр жашау-турмуш болумларын игилендиргендиле, жангызда 2022 жылда аланы саны 4 054-ге жетгенди. Адамладан январьдан бери келген заявленияланы 81,1 проценти да аны юсюнден болгъанды.

Россейни Социал фондуну регионда бёлюмлери адамланы приёмларын жангыртылгъан амал бла бардырадыла. Аны ючюн ала битеу керекли оборудование бла жалчытылыныпдыла: адамла кезиулерин къыйналмай сакъларча жерле бардыла, билдириуле этиледиле, терминал да орнатылгъанды – аны бла инсан специалистни сакълагъан кезиуюнде хайырланаллыкъды. Болушлукъ керек болса, залда администратор дайым ишлейди.

Россейни МЧС-ни Къабарты-Малкъарда Баш управлениясында коррупциягъа къажау юйрениуле бардырылгъандыла. Аланы кезиулеринде бу жаны бла норматив-право эм законодательство актла сюзюлгендиле.

Жерчиликде уруннганла жаз башы сабан ишлеге аз-аздан хазырланып башлагъандыла. Белгилисича, бизни республикада барындан эсе да  кёп нартюх ёсдюрюледи. КъМР-ни Эл мюлк министерствосундан билдиргенлерине кёре, аны урлугъу бла элчиле кеслерин толусунлай жалчытхандыла.

РФ-ни Правительствосуну Председатели Михаил Мишустин жашау журт-коммунал мюлк комплексни айнытыугъа быйыл 30 миллиард сом къоратыллыгъын билдиргенди. Аны хайырындан эм азындан жюз объект эмда 8 минг километр чакълы сетьле жангыртыллыкъдыла. Правительствону комиссиясы онтёрт регионну, ол санда Къабарты-Малкъарны да, тийишли программаларын дурус кёргенди.

Быйыл   Бахсанда  «Кавказ» федерал трассаны  429-чу километринде кёпюрге тынгылы ремонт этилликди  эм тёрт ызгъа дери кенгертилликди. Ол узунлугъу  120 метрге жетген объектди. Былайдан Элбрус курортха баргъанла эм ауур жюк ташыгъан машинала да аслам   жюрюйдюле.

Къабарты-Малкъар къырал аграр университетде «Илму, билим эмда бизнес хар не да тюрлене баргъан кезиуде» деген кёрмюч ётгенди. Аны, илмуну ыйыгъына жоралап, вузну «Экономика эм управление» факультети къурагъанды. Ары келгенлени араларында гитче эмда орта бизнесни, «Нальчикни консерва заводу» ООО-ну, «Маяк» санаторийни, монополиялагъа къажау федерал службаны республикада Управлениясыны (УФАС) келечилери эм башхала бар эдиле.