Кёпюрню кенгертирикдиле

Быйыл   Бахсанда  «Кавказ» федерал трассаны  429-чу километринде кёпюрге тынгылы ремонт этилликди  эм тёрт ызгъа дери кенгертилликди. Ол узунлугъу  120 метрге жетген объектди. Былайдан Элбрус курортха баргъанла эм ауур жюк ташыгъан машинала да аслам   жюрюйдюле. Аны юсюнден бизге Росавтодорну  автомашина жоллагъа къарагъан «Кавказ» управленияны пресс-службасындан билдиргендиле.

Былтыр жайда кёпюрчюле ишлени биринчи къатысын башлагъандыла. Аны бла бирге бир къауум заманнга эки ыздан къуралгъан  хаух кёпюр салыннганды.  Бюгюнлюкде эскисин бузуп башлагъандыла.  Жууукъ заманда аны чыпынларын, тийресинде  черек жагъаланы да  кючлерча жерни тешип темир быргъыла сугъарыкъдыла эм бетон къуярыкъдыла.  Ызы бла  122 метрде хазыр блокладан хуна къаланырыкъды. Жолну  плиталарын, жауун суу саркъгъан быргъыланы эм башха затланы да жангыртырыкъдыла.

Ишлени кезиуюнде жангыдан бетон къуюллукъду,  гидроизоляция этилликди  эм эки къат асфальт жайыллыкъды. Алай бла кёпюр 17 метрден 25 метрге дери жетдирилликди эм юсюнде  3,5 метрлик тёрт ыз тартыллыкъды.  Аны бла бирге буздан къорууларча комплекс,  жол метеостанция,  автомат халда  суу реагент чачдыргъан устройство да жарашдырыллыкъды.  Кёпюрню суу таламазча  конусларын  бетон бла кючлерикдиле эм тюбюне жумушакъ матла салынырыкъдыла. Къоркъуусузлукъ жанына да эс буруллукъду. Ол санда тёгереги бла темир буруула тартыллыкъдыла, жорукъланы билдирген  белгиле  орнатыллыкъдыла эм ызла тартыллыкъдыла. 

Эсге сала айтсакъ, «Кавказ» Р-217 федерал автомобиль жол Къабарты-Малкъарны,  Ставрополь крайны эм  Шимал Осетияны бирге   къошады. Андан сора да, трасса  районну баш жолларындан бирине саналады.  Кюн сайын аны юсю бла 35 минг машина жюрюйдю.