Жангылыкъла

 Жууукъ заманда «Россети Северный Кавказ»  компания Нальчикде  биригиулени барысында  да токну эсеплеген  «акъыллы» счётчикле бла саллыкъдыла. Саулай алып айтханда, аны чеклеринде 5,8 минг чакълы  эсеплеген прибор жарашдырыллыкъды.  

Энчи аскер операция бла байламлы республиканы Башчысыны буйругъу бла 2022 жылны март айында къуралгъан  ишчи къауум ишини эсеплерин туура этгенди. Алагъа кёре аскерчилеге болушлукъгъа бюджетден, андан тышындан да ахча бёлюнеди. КъМР-ни Правительствосуну Къыстырыкъ фондундан мобилизациягъа тюшгенлени кереклерине 40 миллион сом берилгенди. Кийимледен бла техника керекледен да къыстырыкъ этилгенди, анга дайым къошулуп турады.

Исламей элни ючюнчю номерли орта школуну тогъузунчу классда окъуучулары Басхан-ГЭС-де экскурсияда болгъандыла. «РусГидро» компанияны республикада бёлюмюню пресс-службасындан билдиргенлерича, ол усталыкъ сайларгъа себеплик этиу ишни чеклеринде бардырылгъанды.

КъМР-ни  Башчысы спортчулагъа алчы жерлеге чыкъгъанлары ючюн тёленнген ахча саугъаланы ёлчемлерин эки кереге кёбейтиуню юсюнден Указгъа къол салгъанды. Сёз спортну Олимпиадалы эмда Олимпиадалы болмагъан, паралимпиадалы эмда сурдлимпиадалы тюрлюлерине кёре Россейни жыйымдыкъ командаларыны баш, жаш тёлю эмда юниор къауумларына кирген спортчуланы эмда аланы тренерлерини юслеринден барады.

РФ-ни Президенти Владимир Путинни буйругъу бла эмда РФ-ни Правительствосуну «Саулукъ сакълауну къырал эмда муниципал  системасына кирген эмда борчлу халда медицина страхованияны  баш программасына неда борчлу халда медицина страхованияны жер-жерли программаларына къатышхан медицина организациялада ишлеген медиклени къошакъ халда къырал социал болушлукъ бериуню юсюнден» 2022 жылны 31 декабринде чыгъарылгъан бегимине тийишлиликде быйыл 1 январьдан башлап медиклени 11 къауумуна энчи социал тёлеуле тохташдырылгъандыла.

Къабарты-Малкъарда эки жюз школчу «Къоркъуусузлукъну лабараториясы» деген кёчюрюлюучю комплекс бла хайырлана жолда жюрюуню жорукъларын къатлагъандыла. Автоинспекторла жолда эки чархлы транспортда жюрюуге энчи эс бёлгендиле.

КъМР-ни Башчысы Казбек Коков РФ-ни Правительствосуну Председателини орунбасары Татьяна Голикова бардыргъан кенгешге къатышханды. Анда сёз «Маданият» миллет проект 2022 жылда къалай толтурулгъанына къаралгъанды эмда 2023 жылгъа борчла салыннгандыла.

Терек бахчалыкълада  кезиулю ишле башланнгандыла

Къабарты-Малкъарны терек бахчалыкъларында,  къыш кезиу болгъанына  да къарамай,  тийишли ишле тамамланадыла. Ол санда тереклени  керексиз бутакъларын бла чырпыларын кесип кюрешедиле. Белгилисича, терекни  чагъарыгъы эм тирлик берлиги да  ол къалай этилгенине кёре боллукъду.

Къабарты-Малкъар республика жемиш эмда наныкъ бахчала къурау жаны бла алчы жерледен бирин алады, деп билдиргендиле РФ-ни Эл мюлк министерствосундан. Анга статистика шартла да шагъатлыкъ этедиле. Шимал Кавказда аллай тергеуле бла кюрешген ведомствода айтханларыча, озгъан жылны ал кезиуюнде бизни республикада аллай бахчала 24,6 минг гектарны ала эдиле.

Тырныауузда ючюнчю номерли орта школ 1966 жылда ишленнгенди. Энди уа аны тынгылы жангыртыргъа оноу этилгенди, деп билдиргендиле КъМР-ни Жарыкъландырыу эмда илму министерствосундан. Бу объектни инженер сетьлерин, тыш къабыргъаларын да жангыртырыкъдыла, экинчилери жылыракъ болурча да этерикдиле. Дагъыда объектни башын алышырыкъдыла, ичинде уа сюртюу-бояу ишле бардырлыкъдыла. Быйыл Элбрус районда быллай тёрт объект жангыртыллыкъды. Ишле Быллымда, Нейтрино эмда Элбрус элледе бардырыллыкъдыла. Бары да «КъМР-де школ системаны жангыртыу» деген программаны чеклеринде.