Жангылыкъла

«Заман» миллетибизни жангыз газетиди. Аны бетлеринде малкъар халкъны маданиятыны, тарыхыны, бюгюннгю жашаууну, айтхылыкъ адамларыны, жетишимлерини эмда жарсыуларыны юсюнден басмаланнган материалланы сиз бир башха изданияда табаллыкъ тюйюлсюз.

Къабарты-Малкъарда саулукъларына чып тюшген сабийлеге Нальчикде бассейннге хакъсыз жюрюрге онг берилгенди. Бу жумушну республиканы Правительствосуну, Сакъат сабийлени битеуроссей организациясыны регионда бёлюмю, Водолечебницаны администрациясы бла бирге къурагъандыла. Бассейн сабийлеге хар ыйых кюн сагъат 10-12 дери бериледи. Ол кезиуню ичинде ала эки къауумгъа юлешинип жюзедиле,  бир кереге отуз адам кирирге боллукъдула.

Бу кюнледе Басхан ауузунда Минги тауну тийресиндеги эки бош участкагъа къараргъа инвесторла келгендиле. Аны юсюнден «Кавказ.РФ» акционер обществону пресс-службасы билдиреди. Алай бла энчи экономика зонада 3 минг адам сыйынырча къонакъ юйле, спорт комплекс, тюбинг-парк эм черек жагъасы бла жаяу жолчукъ ишлер мурат барды.

Бюгюн Нальчикге СКФО-ну авария – къутхарыу ишлени бардыргъан бек кючлю командалары жыйылгъандыла. Ала «Автомобиль транспортда авария-къутхарыу ишлени бардырыуда бек кючлю командасы» деген регион эришиуде кеслерини хунерлерин ачыкъларыкъдыла.

Къабарты-Малкъарны альпинизмден, таулагъа ёрлеуден бла спорт туризмден федерациясы тарых, маданият эм башха магъаналы кюнлеге атап, таулагъа ёрлеулени дайым къурайды. Быйыл да, алгъа жылладача, Малкъар халыкъны жангырыуу кюнюне жорланып, аслам адамны къатышыуу бла Бука-къаягъа неда башха аты Науджидзагъа ёрлеу болгъанды, анга къошумчулукъну «К вершинам» клуб да этгенди. 

«Газпром газораспределение Нальчик» компания кесини ишин кючлендирилген халгъа кёчюргенди. Андан билдиргенлерича, аны магъанасы жаз башында эмда жай кезиуде черекле кётюрюлюп башланырыгъына тынгылы хазыр болурчады деп алайды.

 «Кавказ.РФ» обществону пресс-службасындан билдиргенлерине кёре, Минги тауда алты экомаршрут бу жайда айбатландырыллыкъдыла. Ала Шимал Кавказда эм ариу боллукъдула, къонакълагъа бла туристлеге, спортну сюйгенлеге да сейир кёрюнюрюкдюле.

Энди ата-анала сабийни биринчи классха берирча «Госуслуги» порталда заявленияны алгъадан жазып къояллыкъдыла.  Аны энчи кабинетде  «черновик» халда сакълап приём башланнгынчы сакъларгъа жарайды. Кезиу жетсе уа, жаланда «Отправить» кнопканы басып жиберирге  боллукъду. 

КъМР-ни экономиканы айнытыу министри Рахайланы Борис конкуренцияны айнытыугъа эмда тап инвестициялы болум къураугъа къыйын салгъанланы саугъалагъанды. Министерствону аны бла байламлы Ыразылыгъы муниципалитетлеге, шахар округлагъа, коллективлеге, адамлагъа берилиучюдю.

Бийик билим берген учрежденияланы тауусханлагъа деп ишчи жерлени ярмаркасы бардырылгъан эди Нальчикде кёп болмай. Анга «Газпром газораспределение Нальчик» компания да къатышханды.