Байламлыкъла бютюн уллу хайыр берликдиле

Россельхознадзорну Къабарты-Малкъарда эмда Шимал Осетияда бёлюмюнде ведомствону бла КъМР-де Ветеринария управленияны арасында байламлыкъла къурауну юсюнден кенгеш болгъанды. Сёз мында пробала алыуну эмда лаборатория тинтиуле бардырыуну юсюнден барады, деп билдиргендиле ведомствону пресс-службасындан. Жыйылыугъа бёлюмню башчысы Рустам Абдулхаликов, Россельхознадзорну Референт арасыны таматасы Хаути Сохроков, Ветеринария управленияны башчысы Аслан Арамисов эм башхала къатышхандыла.

Сагъынылгъан теманы юсю бла Референт араны башчысыны орунбасары Ж.М. Жамукова, Россельхознадзорну къырал ветеринария надзорлукъ бёлюмюню башчысы А.Ю. Даурова, Ветеринария управленияны эпизоотиялагъа къажау ишле, диагностика эм ветсанэкспертиза бёлюмюню таматасы М.А. Карданов сёлешгендиле.

Специалистле белгилегенлерича, пробаланы алыу, аланы жерине жетдириу, тинтиулени бардырыу, аланы протоколларын жарашдырыу жаны бла норматив документледе айтылгъанны жик-жиги бла этерге керекди. Ол санда продукция Таможня союзну техника регламентине эмда Россейде хайырланылгъан норматив документлеге келишгенин тохташдыргъанда да.

Жыйылыуну ахырында эки ведомствода мындан арысында не тюрлю лаборатория тинтиуле этилгенин, кенгешле, «тёгерек столла», жыйылыула бардырылгъанын  бир-бирлерине билдирип турургъа оноулашхандыла.