Предпринимательствону тарыхын билгенле эришгендиле

Алгъаракъда Нальчикде Россейде предпринимательствону тарыхыны юсюнден Битеуроссей олимпиаданы регион кезиую ётгенди. Аны «Иш кёллю Россей» деген жамауат организацияны жер-жерли бёлюмю къурагъанды, деп айтылады аны сайтында.

Олимпиадагъа студентле, аспирантла эм школчула къатышхандыла – битеу да жюзден артыкъ адам. Аны бардырыугъа КъМКъУ бла КъМКъАУ да себеплик этгендиле. Комиссиягъа организацияны эмда бу вузланы келечилери киргендиле. Аланы санында: «Иш кёллю Россейни» бёлюмюню башчысыны орунбасары Гузеланы Индира, Россейни жаш предпринимательлерини союзуну жер-жерли бёлюмюню таматасы Юлия

Овдиенко, аграр университетни доценти Зумакъулланы Фатимат, КъМКъУ-ну доценти Рита Кушбокова эм башхала бар эдиле.
Тестле алтышар блокладан къуралгъандыла. Алада, сёз ючюн, бизни къыралда предпринимательствону тарыхыны, революциягъа дери заманлада промышленностьну айнытыугъа аслам кюч салгъан предпринимательлени атларыны бла биографияларыны, озгъан ёмюрде эм уллу предприятияланы къурагъанланы юсюнден соруула бар эдиле. Эришиулеге къатышханлагъа дагъыда тематикалы кроссвордну этерге, реклама плакатда кёргюзтюлген буруннгулу предприятияны атын билирге, тохташдырылгъан терминлени бла сёзлени магъаналарын ангылатыргъа тюшгенди. Тестлени ахыргъы кесегинде уа белгиленнген темагъа эссе жазаргъа керек эди. Сагъынылгъан ишлени барына да юч сагъат берилгенди.

Олимпиаданы эсеплерин бу кюнледе чыгъарлыкъдыла. Ол кеси да конкурс комиссия, тенг балла алып, хорламгъа тийишли болгъан ючеулен бла тюбешип, энчи ушакъ этгенден сора белгили боллукъду.