Не аламат технологияла да адамны сейирлерини чеклеринден ётмезге керекдиле

Хар жыл сайын Россейде, башха къыралладача, Хайырланыучуну эркинликлерин къоруулауну битеудуния кюню белгиленеди. Хайырланыучуланы организацияларыны халкъла аралы федерациясы анга бир тюрлю чакъырыу къураучуду. Быйыл ол быллайды: «Trusted Smart Products – Цифралы дуния: ышаннгылы смарт-устройствола».

Смартфонла, къолда жюрютюлген фитнес-трекерле, "акъыллы" телевизорла, смарт-сагъатла, розеткала, болушлукъчу электроника эм алагъа ушаш башха затла смарт-устройстволадыла.

Бюгюнлюкде цифралы технологияла кёп тюрлю продуктланы бла жумушланы тюрлендире барадыла. Алада болгъан программала бир жаны бла адамны ишин, жашауун да женгилирек этедиле. Алай аны бла бирге аны юсюнден энчи информацияны сунмай тургъанлай башхалагъа билдирирле деген къоркъуу да барды. Хайырланыучуну эркинликлерин къоруулауну битеудуния кюню уа цифралы технологияла адамланы сейирлерини чеклеринден ётерге жарамагъанларына халкъны эсин бурургъа ахшы сылтауду. Сёз сагъынылгъан электрониканы качествосуну, къоркъуусузлугъуну эмда бизни юсюбюзден къаллай информацияны жыйгъанларын, аны жарашдырып андан ары неде хайырланнганларын толусунлай билирге эркин болгъаныбызны юсюнден барады.

Роспотребнадзорну Къабарты-Малкъарда Управлениясы бу иш бла байламлы талай жумуш тамамларгъа умут этеди. Ол санда мектепледе, бийик эмда энчи орта билим бериу учреждениялада, библиотекалада, сатыу-алыу аралада Ачыкъ эшиклени кюню бардырыллыкъды. Соруулары болгъанлагъа уа ведомствода (ишчи кюнледе) энчи телефон номер ишлерикди: 42-03-32.

 

Улбашланы Мурат хазырлагъанды.
Поделиться: