Байрам кюнледе жамауат къоркъуусузлукъну жалчытыргъа деп борч салыннганды

Элбрус районну администрациясыны башчысы Залийханланы Къаншаубий Терроризмге къажау муниципал комиссияны жыйылыуун бардыргъанды. Анга  Россейни ОМВД-сыны, КъМР-де УФСБ-ни Тырныауузда бёлюмюню, район прокуратураны, жол управленияны, МЧС-ни КъМР-де Баш управлениясыны бёлюмюню, район аскер комиссариатны, тюрлю-тюрлю организацияланы бла управленияланы таматалары,  шахарны бла эллени башчылары къатышхандыла.

Жыйылыуну башлай, Залийханланы Къаншаубий Малкъар халкъны жангырыууну байрамы бир тюрлю хатасыз, чырмаусуз, бийик даражада ётерча этиуню баш борчха санагъанды.  «Право низамны сакълаучу, терк болушлукъ бериучю службала, кюч структурала да бир тилли болуп, келишиулюкде ишлерге керекдиле. Чыкъгъан чурумланы бла бузукълукъланы заманында кетерирге, ишлерин планнга кёре бардырыргъа борчлудула»,-дегенди.

Кенгешде Россейни  МВД-сыны Элбрус районда бёлюмюню полициясыны таматасы Сергей Скичко, культураны район управлениясыны аналитика бёлюмюню специалисти Гуданаланы Милена, Элбрус районну администрациясыны башчысыны орунбасары Муаед Азубеков, «Элбрус-Транс» ООО-ну директору Темуккуланы Абдул-Хаким  да докладла этгендиле. Андан сора комиссия эсгертиуле этгенди. Ол санда жууаплы адамлагъа  къууанчла баргъан жерледе дежурналыкъ этерге кереклиси айтылгъанды. Андан сора да адамла кёп жыйылгъан жерледе бла бир-бир объектледе къоркъуусузлукъну къошакъ мадарларын этерге, терроризмден бла от тюшюуден сакъланыуну жалчытыргъа буюрулгъанды.

Битеу айтылгъан оюмла эсге алынып, ахыр оноу чыгъарылгъанды, протокол буйрукъла берилгендиле, аланы толтурлукъла да белгиленнгендиле.