Экономика

Энчи предприниматель патент алырча, заявленияны жангы формада берирге керекди. Онбиринчи январьда кийирилген тюрлениулеге кёре, энди инсаннга анда къайда жашагъанын неда къайда тургъанын билдирирге кереклиси жокъду, дегендиле Федерал налог службаны КъМР-де Управлениясында.

Май районда «Ленинцы» эл мюлк кооператив жетишимли ишлегенли бу кюнледе 92 жыл толгъанды. Анда уруннганла мюлкню кезиулю байрамын ишлеген жерлеринде белгилегендиле, деп жазадыла «Майские новости» газетни бетлеринде.

Былтыр Къабарты-Малкъарны агропромышленный комплексини  бёлюмлери  61,4 миллиард сом багъасына продукция чыгъаргъандыла. Ол буруннгу жыл  бла  тенглешдиргенде он процентге кёпдю.  

КъМР-ни Эл мюлк министерствосундан билдиргенлерича, «Халкъла аралы  кооперация эм экспорт» миллет проектге кирген  «АПК-ны продукциясыны экспорту» деген республикалы  программагъа  кёре  былтыр  4,2 минг гектар жерде  сугъарылырча мадар этилгенди. Буруннгу жыл бла тенглешдиргенде ол 2,6 кереге кёпдю.

Былтыр  Росстат бардыргъан рейтиннге кёре, Къабарты-Малкъар промышленный производство бёлюмде ахшы эсеплери ючюн  Россейни  жети алчы регионуну санына къошулгъанды.  

Кёп болмай видеоконференция халда  Россейни промышленниклери бла   предпринимательлерини Шимал - Кавказ федерал округда координация советини кенгеши бардырылгъанды. Анга КъМР-ни  Правительствосуну  Председатели  Мусукланы Алий, экономиканы айнытыу  министр Рахайланы Борис  эм  промышленность, энергетика эмда  сатыу-алыу министр  Шамиль Ахубеков да кътышхандыл. Аны юсюнден  КъМР-ни Экономиканы айнытыу министерствосуну пресс-службасындан билдиргендиле.

Шимал-кавказстатны эсеплерине кёре, былтыр Къабарты-Малкъарда малчылыкъ бла байламлы аслам продукция чыгъарылгъанды. 

Ара шахарда биржаны билдириуюне кёре, Къабарты-Малкъарда жашагъанла, озгъан жылны ахырына он мингден артыкъ энчи инвестиция счёт ачхандыла. Саулай Шимал Кавказда уа аланы саны жюз мингден атлагъанды.

КъМР-ни Эл мюлк министерствосуну башламчылыгъы бла бардырылгъан   «Комплекс халда эл жерлени айнытыу» къырал программагъа кёре эки жылны ичинде республикагъа  227,38 миллион сом болушлукъ берилликди.  Аны асламысы, неда   225,106 миллион сом чакълысы, федерал бюджетден бёлюнюрюкдю, республикада кесинден да    2,274 миллион сом къошарыкъды. Аны юсюнден  профильли ведомствону  пресс-службасындан билдирелдиле.

Былтыр Къабарты-Малкъарда  1380 гектар чакълы бир жерде терек бахчалыкъла   салгъандыла. Ол  «Къабарты-Малкъарда эл мюлкню айнытыу эм эл мюлк продукцияны, сырьёну эм аш-азыкъны  рыногун къурау» деген  къырал программада белгиленнгенден   эсе 110 процентге кёпдю. 

Республиканы мюлклеринде алма, кертме, эрик, шаптал эм башха  жемиш терекледен сора да,  наныкъны эм жилекни да аслам саладыла. 

Россейни Эл мюлк министерствосунда  айтханларыча, республика  терк айныгъан терек  бахчалыкъланы  орнатыу беш биринчи регионну тизмесине киреди.