Экономика

Былтыр «Россети Северный Кавказ» компанияны бёлюмю «Каббалкэнерго»  болжалдан кеч  къалмай  226 миллион сом   налог  тёлеп, жылны борчсуз бошагъанды,  деп билдиредиле  энергокюч компанияны пресс-службасындан. 

Кёп болмай  Чегем муниципал районну администрациясыны башчысы Юра Борсов  «Овощи Ставрополья»  биригиуню таматасы   Дмитрий  Мугер бла тюбешгенди. Ала  быйыл Чегемде 100 гектарда «Дары Кавказа» деген жемиш эм наныкъ ёсдюрген  республикада эм уллу теплица комплексни   ишлерча планны сюзгендиле.  Аны юсюнден бизге жерли-жерли администрацияны пресс-службасындан билдиргендиле. 

Быйыл Къабарты-Малкъарда онбир айгъа промышленный  производствону индекси  111 процентге жетгенди, деп билдиредиле  Севкавстатны пресс-службасындан. Экономиканы бёлюмлерин  энчи алып айтханда, табийгъат байлыкъланы хайырланыу - 78,6 процентге, жарашдырыучу производство  -109,3 процентге, ток, газ эм пар, хауа бла жалчытыу - 123,5 процентге, суу бла жалчытыу, къалгъан-къулгъанланы кетериу  да 82,1 процентге ёсгенди.      

Былтыр Къабарты-Малкъарда  сют  малчылыкъ бёлюмде  къармашхан мюлклени барысы да  бирге   537,5 минг тонна сют сатхандыла. Буруннгу жыл бла тенглешдиргенде, ол 104,5 процентге кёпдю, деп билдиредиле Кавказстатдан.

Быйылгъы  жылны аллында белгиленнген эсеплеге кёре,   Россельхозбанкны Къабарты-Малкъарда бёлюмю (РСХБ)  гитче  эм орта  бизнесде къармашхан предпринимательлеге   766 миллион  сомдан аслам ёнкюч бергенди.   Аны юсюнден бизге  финанс  учреждение пресс-службасындан билдиргендиле.

Былтыр банк  инвестиция  проектлени, кезиулю ишлени бардырыргъа, техника алыргъа эм башха жумушланы тамамларгъа   гитче эм орта бизнесни келечилерине 677 миллион сом  эм микропредпринимательлеге да 99 миллион сом   бёлгенди.  

Былтыр Къабарты-Малкъарда жемишледен бла наныкъладан 517 минг тонна жыйылгъанды. Россейни Эл мюлк министерствосундан билдиргенлерича, къыралны мюлклерини барысында да жемишледен бла наныкъладан  3,6 миллион тонна тирлик аланнганды. Ол былтыр  бла тенглешдиргенде 2,2 процентге кёпдю.

«РосБизнесКонсалтинг» компанияны сайтында жазылгъанына кёре, пандемия бла байламлы банкла кредитлени алгъынча ёлчемде бермейдиле. 65 процентден аслам адам займны алалмагъандыла. Банклада кредит политиканы хар бёлюмде да бирча къатыландырмагъандыла. Эм аз ахча автокредитование жаны бла берилгенди: 2019 жылда 56,5 процент тилек къабыл кёрюлмеген эсе, былтыр а ол тарих 62 процентге жетгенди. Алай ипотекалагъа уа алгъа жылладан эсе кёбюрек ахча бёлюннгенди, аны юсюнден заявкаланы 71,3 проценти къабыл кёрюлгенди.

Федерал таможня  службаны Къабарты-Малкъарда бёлюмюнден билдиргенлерича, былтыр республиканы агропромышленный комплекси чыгъаргъан продукциядан 22 миллион долларгъа экспорт этилгенди.  Ол а  планда белгиленнген кёрюмдюден 13 процентге кёпдю. 

Озгъан жылда Къабарты-Малкъарда тюрлю-тюрлю  товарла бла жумушла ючюн картала бла 24,6 миллион сом чакълы тёленнгенди. Буруннгу жыл бла тенглешдиргенде ол эки кереге кёпдю. Быллай амалны  бюгюнлюкде жамауатны 43 проценти хайырланады эмда аны ёлчеми   16,7 миллиард сомгъа жетеди.  

Кёп болмай  Нальчикде Къабарты-Малкъарны электрокюч бла  къоркъуусузлугъун  жалчытыу  штабны кенгеши ётгенди.    Аны комиссияны башчысы, Правительствону  Председателини биринчи орунбасары  Муаед Кунижев бардыргъанды.