Терек бахчаланы санына къошулады

Былтыр Къабарты-Малкъарда  1380 гектар чакълы бир жерде терек бахчалыкъла   салгъандыла. Ол  «Къабарты-Малкъарда эл мюлкню айнытыу эм эл мюлк продукцияны, сырьёну эм аш-азыкъны  рыногун къурау» деген  къырал программада белгиленнгенден   эсе 110 процентге кёпдю. 

Республиканы мюлклеринде алма, кертме, эрик, шаптал эм башха  жемиш терекледен сора да,  наныкъны эм жилекни да аслам саладыла. 

Россейни Эл мюлк министерствосунда  айтханларыча, республика  терк айныгъан терек  бахчалыкъланы  орнатыу беш биринчи регионну тизмесине киреди.  

Бюгюнлюкде садлада   къыстау кезиулю ишле барадыла. Ол санда тереклени  керексиз бутакълары бла чырпыларын кеседиле эм сынмазча бетон чыпынлагъа  къысадыла.  Специалистле билдиргенлерича, заманында тамамланнган тийишли  жумушла  ёсюмлюкле иги чагъарча, ол санда бай тирлик берирча  уллу себеплик этерикдиле. 

Былтыр республиканы аграрчылары  жемишледен бла наныкъладан  517,3 минг тонна тирлик жыйгъандыла, буруннгу жылдан эсе  148 процентге аслам.