Мелиорация жумушлагъа – къырал болушлукъ

КъМР-ни Эл мюлк министерствосундан билдиргенлерича, «Халкъла аралы  кооперация эм экспорт» миллет проектге кирген  «АПК-ны продукциясыны экспорту» деген республикалы  программагъа  кёре  былтыр  4,2 минг гектар жерде  сугъарылырча мадар этилгенди. Буруннгу жыл бла тенглешдиргенде ол 2,6 кереге кёпдю.

Сагъынылгъан проектни чеклеринде былтыр  аграрчыла 349,1 миллион сомну хайырланнгандыла. Аны асламысы, неда  345,6 миллиону, федерал бюджетден берилгенди, республика да  кесинден 3,5 миллион сом къошханды. 

 - Бюгюнлюкде мелиоратив комплексни айнытыу  республикагъа уллу магъанасы  болгъан жумушладан бириди. Арт жыллада жауунла азайгъанлары ючюн битимле суу жетмей къыйналадыла.  Аллай кезиуледе уа  тамычы халда суу сугъаргъан машинала эм системала хайырланадыла.   Сёз ючюн, былтыр кёбюсюнде жангы технологияланы  себеплиги бла жемишден, наныкъдан эм мирзеуден да  болмагъанча  бай тирлик жыйылгъанды.   Ол себепден бу жаны бла игилендириу ишле мындан арысында да тири бардырыллыкъдыла. Келир жыллада  иги тирлик алыргъа эмда къоншу регионланы да  жалчытыргъа умутубуз барды, - дегенди КъМР-ни эл мюлк министри  Хасан Сижажев.

Эсге сала айтсакъ, былтыр  республикада сугъарылгъан жерлени уллулукълары   7,94 минг гектаргъа жетгенди.  Андан 4,2 минг гектар «Халкъла аралы кооперация эм экспорт» къырал проектге  эм  3,74 минг гектар да  «Россейде мелиоратив комплексни айнытыу» ведомстволу  программагъа кёре тамамланнгандыла