Студентле резюме жазаргъа юйреннгендиле

Къабарты-Малкъар къырал аграр университетни экономика эм управление факультетинде «Тюз жарашдырылгъан резюме – жетишимли карьерагъа биринчи атламды» деген ат бла юйретиу дерс бардырылгъанды. Аны республиканы Урунуу, иш бла жалчытыу эмда социал къоруулау арасыны жаш тёлюге себеплик этген бёлюмю къурагъанды, деп билдиргендиле вуздан. Сагъынылгъан Ара бла бирге бу дерсни бардырыргъа КъМКъАУ-ну Профориентация эмда выпускниклени иш бла жалчытыргъа себеплик этген арасы да къыйын салгъанды. Жыйылыугъа преподавательле, вузну келечилери да къатышхан эдиле.

Жаш тёлюню аллына чыгъып, сагъынылгъан республикалы Араны бёлюмюню башчысы Руслан Эльмесов сёлешгенди. Ол резюме къалай жарашдырылыучусун, анкетаны къалай толтурургъа кереклисин да ангылатханды. Дагъыда иш бла жалчытыучуланы документлеге излемлери бла шагъырейлендиргенди. Къысхасы, ушакъ ачыкъ, шуёхлукъ халда ётгенди. Дерсни ахырында уа аграр университетде дагъыда «Иш излерге баргъан жерде кесинги къалай жюрютюрге керекди», «Россей Федерацияны иш бла жалчытыу бёлюмюнде электрон ресурсла» деген темалагъа быллай тюбешиуле къураргъа оноулашхандыла.