Шуёхланнгандыла, билимлерин кенгертгендиле

      Нальчикде  "Нарт" къонакъ юйде  "Къабарты-Малкъар - келишиулюкню тийреси" деген ат бла  динле аралы форум бардырылгъанды.  Аны ишине иймам  Абу Ханифа атлы  ислам университетни ректору Чочайланы Шарафутдин,  КъМР-ни  Муслийманларыны дин управлениясыны таматасыны орунбасары Аслан Гедгафов, республикада православный килисаланы таматасыны болушлукъчусу Константин Осипов, Москвада педагогика къырал университетде жаш тёлюню  ишлери жаны бла управленияны таматасы, форумну баш эксперти  Къайгъырмазланы Арсен, МЧС-ни биринчи категориялы къутхарыучусу, кёп пособияланы  автору Михаил Сафронов къатышхандыла.
       Аладан сора да, жыйылыугъа лингвистика илмуланы кандидаты, ЮФО-да миллетлени ишлери жаны бла  эксперт советни члени Лейля Сапьян,  Ставрополь крайда семинарияны, воскресный школланы, Абу Ханифа атлы ислам университетни студентлери, дин бла байламлы  билимлерин ёсдюрюрге  сюйген жаш адамла да келгендиле. Аланы КъМР-ни  Граждан обществону институтлары бла байламлыкъла жюрютюу эмда миллетлени ишлери жаны бла министр Анзор Курашинов алгъышлагъанды.  Ол  республиканы оноучулары форумгъа  уллу эс бургъанларын эмда  иши жетишимли болур деп бек   ышаннганларын билдиргенди. «Аны къурагъанланы муратлары -  тюрлю-тюрлю миллетледен болгъан эмда башха-башха   динле тутхан жаш адамла бир бирлерин игирек билирча,  жууугъуракъ болурча этиудю, келишиулюкню, шуёхлукъну  кючлендириудю», - дегенди. Аслан Гедгафов,  Константин Осипов да жаш адамлагъа  насийхат сёзлерин айтхандыла, бир бирге хурмет этерге, тёзюмлю болургъа чакъыргъандыла.
         Форум  тёрелиди, къырал программагъа тийишлиликде къуралгъанды, лагерь халда ишлегенди.  Анга 18-25-жыллыкъ жаш адамла къатышхандыла. Аланы араларында муслийманла, иудейле, христианла,  башха динлени  келечилери да болгъандыла. Эки кюнню ичинде ала  тренинглеге, "тёгерек столлагъа", белгили адамла бла тюбешиулеге къатышхандыла, сейир лекциялагъа тынгылагъандыла. Аланы уа Москвадан, Дондагъы Ростовдан, Ставрополь крайдан келген, ислам университетде  ишлеген преподавательле,  алимле окъугъандыла.
     Эки кюн жаш адамлагъа  эки сагъат кибик ётгенди. Ала белгиленнген программагъа кёре ишлегендиле, килисагъа, межгитлеге да баргъандыла, тенглери бла танышхандыла, ушакъла бардыргъандыла.